Dr. Mohamed Abdel-Aziz

- عايز النوع ده !
= لا والله ناقص بقاله فتره.
- ناقص ازاي؟
= يعني الشركة نفسها مبتنزلش جديد ف السوق
- يعني مش هلاقيه!؟
= انت ونصيبك دور وشوف
- طب ماتعرفش ألاقيه فين؟
= لا والله، وأنا هعرف منين هو موجود في صيدليات ايه ازاي!
- يعني أدور !؟
= اللي يريحك بس رأيي ترجع للدكتور يكتبلك بديل ليه لغاية ماينزل
- طب متعرفش هينزل امتي ؟

النهارده مش وقت نقول: «ما إحنا قلنا»…

ومش وقت شماتة ولا مزايدة على وجع حد.

النهارده وقت نقف جنب دفعة صيدلة 2023.

دفعة انتظرت ما يقرب من 3 سنين، وبعد كل الانتظار ده ناس فتحت النتيجة من شوية لقت قدام اسمها كلمة بارده جدًا:

«النتيجة --- استنفاذ».

يعني لم يتم ترشيحهم لأي جهة من الجهات اللي اختاروها في حركة التكليف الحالية.

والمعلن قبل الحركة إن التكليف هيشمل 45% فقط من إجمالي خريجي الدفعة؛ يعني 55% خارج النسبة المقررة للتكليف.

أما رقم 79% المتداول، فده مش نسبة اللي اتكلفوا ولا نسبة اللي ما اتكلفوش؛ ده مجموع تقريبي ذكرت التقارير إن الاستنفاذ بدأ يظهر تحته.

وفي شكاوى متداولة من خريجين مجاميعهم حوالَي الـ80% وبرضه ظهر لهم استنفاذ رغبات، وده ممكن يحصل لأن الحركة اتعملت على أساس الاحتياج والمجموع وترتيب الرغبات، مش المجموع لوحده. وده محتاج توضيح رسمي وشفاف للحدود الدنيا وطريقة التوزيع.

تخيل سنين الدراسة والتعب، وبعدها سنين من الانتظار، وفي الآخر مستقبلك كله يتلخص في كلمة على موقع… من غير ما يبقى قدامك تصور واضح: هتعمل إيه بعد كده؟ هل فيه حركة تكميلية؟ هل فيه تظلم؟ ولا خلاص خرجت من الحسابات؟

لكل زميل وزميلة من الدفعة دي: إحنا حاسين بيكم، والنتيجة دي لا تقلل من علمكم ولا اجتهادكم ولا قيمتكم كصيادلة.

أنتم مش سبب الأزمة… أنتم اللي بتدفعوا تمنها.

إحنا وصلنا في مصر لـ74 كلية صيدلة، بتخرج حوالَي 25 ألف صيدلي كل سنة.

فمش منطقي نستمر سنين في فتح كليات وزيادة أعداد المقبولين، وبعد ما الطالب يخلص دراسته نقوله: السوق مش محتاجك… اتصرف!

دي مش مشكلة خريج فشل يطور نفسه.

دي مشكلة تخطيط، وعدم ربط حقيقي بين التعليم واحتياجات سوق العمل.

وعشان كده لما بنتكلم مع طلبة الثانوية العامة ونحذرهم، إحنا مش بنحقد عليهم، ومش خايفين حد يدخل ينافسنا، ومش بنقول إن صيدلة كلية وحشة.

بالعكس…

صيدلة من أجمل الكليات في دراستها، وعلمها ملوش آخر، ومجالاتها فعلًا متنوعة جدًا: صيدليات، مستشفيات، تصنيع، جودة، تسجيل دوائي، يقظة دوائية، تسويق، أبحاث، ومجالات تانية كتير.

لكن لازم نقول الحقيقة كاملة:

وجود مجالات كتير على الورق مش معناه إن فيه فرص كفاية مستنية كل الخريجين، ولا إن كل المجالات دي سهلة الدخول أو مرتباتها كويسة.

كتير منها محتاج إنجليزي قوي، وتدريب حقيقي، ومهارات إضافية، وعلاقات مهنية، وأحيانًا سفر أو انتقال لمحافظة تانية، وقبول ببداية مادية ضعيفة لحد ما تبني خبرة.

تطوير نفسك مهم جدًا، وهيفرق معاك فعلًا…

بس تطوير نفسك يزود فرصك، ما يديكش ضمان.

ومش منطقي أصلًا إن الخريج يبقى مطلوب منه كل يوم «يجيب القرش من بوق الأسد» علشان يقدر ياكل ويشرب ويفتح بيت. الطموح مهارة شخصية مهمة، لكنه مش بديل عن سياسة تعليم وتشغيل محترمة.

ولو داخل صيدلة على أساس إن التكليف الحكومي مضمون، لازم تعرف إن الكلام ده مبقاش صحيح.

وعشان نكون واضحين: التكليف ماتلغاش رسميًا، بس اللي بيتطبق دلوقتي إنه بقى حسب الاحتياج الفعلي؛ يعني مش كل خريج في الدفعات الجاية مضمون يتكلف، والنسبة ممكن تزيد أو تقل من دفعة للتانية حسب الأعداد والاحتياجات.

واللي بيقول لطالب الثانوية دلوقتي: «ادخل صيدلة وهتتعيّن حكومي»، بيبيعه وعد قديم لم يعد مضمونًا.

وحتى لو عندك رأس مال، فتح صيدلية مش زرار هتدوس عليه أول ما تتخرج.

فيه شروط ترخيص، ورأس مال، ومكان مناسب، ودراسة جدوى، ومصاريف تشغيل، وسوق صعب ومنافسة شديدة. وامتلاك صيدلية في حد ذاته مش ضمان للنجاح أو للدخل المحترم.

خصوصًا إن الصيدليات الخاصة نفسها بتواجه ارتفاع مصاريف التشغيل، وهامش ربح مضغوط، وحرق أسعار ومنافسة غير منضبطة، وشكاوى من توجيه الروشتات لمصالح بعينها.

وفي نفس الوقت أدوية ومستحضرات مجهولة المصدر بتتباع خارج القنوات المرخصة، وكل يوم باب جديد للسبوبة بيتفتح على حساب المريض والصيدلي اللي شغال بشكل قانوني.

والمهنة بتواجه كل ده في وقت النقابة العامة لصيادلة مصر نفسها تحت الحراسة القضائية من أكتر من 7 سنين، ومن غير مجلس منتخب يدير النقابة ويمثل الصيادلة ويدافع عن حقوقهم بالشكل الطبيعي.

دي مش تفاصيل جانبية… دي صورة المهنة كاملة.

والمطلوب دلوقتي مش مجرد إننا نقول لدفعة 2023: «ربنا يعوضكم».

المطلوب بيان رسمي يقول لنا بالأرقام: كام واحد قدم، وكام واحد اتكلف، وكام واحد ظهر له استنفاذ رغبات، وإيه الحد الأدنى والناس اتوزعت على أساس إيه.

المطلوب فتح باب تظلمات حقيقي، وتوضيح مصير المستنفذين، وهل توجد حركة تكميلية لو ظهرت أماكن شاغرة.

والمطلوب إعلان سياسة واضحة لدفعات 2024 وما بعدها، بدل ما كل دفعة تفضل عايشة سنين في قلق ومستنية تعرف مصيرها.

وقبل كل ده، لازم أعداد المقبولين في كليات الصيدلة ترتبط فعلًا باحتياجات الدولة والسوق، بدل ما نستمر في تخريج آلاف جديدة كل سنة ثم نحمل الخريج وحده نتيجة سوء التخطيط.

لو بتحب الصيدلة وعلمها، ومستعد تبدأ من أول يوم تبني لنفسك مسار حقيقي وأنت فاهم كل الواقع ده… ادخلها وربنا يوفقك.

لكن لو داخل علشان «التكليف مضمون»، أو علشان لقب دكتور، أو لمجرد إن مجموعك جابها… راجع قرارك كويس جدًا.

الصيدلة مش كلية وحشة…

لكن عظمة العلم لا تعني عدالة سوق العمل.

وإحنا مش بنقفل الباب في وش حد؛ إحنا بس بنشيل اليافطة القديمة اللي مكتوب عليها «وظيفة مضمونة»، ونحط مكانها الحقيقة قبل ما طالب يدفع سنين من عمره وهو فاهم الواقع غلط.

كل الدعم والتضامن مع صيادلة دفعة 2023…

وقيمتكم أكبر بكتير من كلمة ظهرت جنب اسمكم على موقع.

لما تجهز روشته كبيره كلها أصناف غاليه وتقعد ساعة تكتب علي العلب وفي الآخر يقولك أنا كنت عايز أسعرها بس ..

- تمام يافندم اتفضل العلبة أهي، الحساب ٩٠ جنيه.
= ٩٠ ازاي، دانا بجيبها من صيدلية فلان ب ٦٠ جنيه تقريباً بيعملي خصم!
-..

اللي هيخلي السيتال والتمبورال شرب سعرهم يرفع بكره أهو 🤡

تم بيع قلمين مونجارو ...