wafaa Ibrahim Hair treatment.Nails

معلومه 👍🏻❤️

👌👌تعليمات بعد البروتين مهمة جدا احفظوها كويس 👍🏻

طيب أنتى عملتى البروتين أهو و بقى كله تمام إزاى بقى تحافظى عليه علشان يعيش معاكى ويفضل مفرود و جميل ..

🙆أول حاجة متغسليهوش بشامبو الا كل اسبوع مرة واحدة و طبعا شامبو يكون مخصوص للعناية بالشعر بعد البروتين لان الشامبو العادى هينشف الشعر.. و متغسليهوش اكتر من تلت مرات فى الاسبوع ،مرة واحدة بالشامبو وبعد كده تعمليله حمام كريم او تغسليه ببلسم المرتين التانيين

🙆تانى حاجة مينفعش تنامى بيه وهو مبلول او تلبسى حجاب عليه وهو مبلول لأن الشعر بيكون وهو مبلول فى أضعف حالاته وبيتشكل بسهولة على الوضعية اللى هيكون عليها ومينفعش تربطيه او تحطى توك فيه وهو مبلول فياريت تخلوا بالكم كويس من النقطة دى
💆طيب المفروض لما تغسليه تعملى إيه؟؟
المفروض لما تطلعى من الحمام تستنى 5 دقايق كده قبل ما تسرحيه علشان مسمام الشعر بتكون مفتحة وغلط التسريح اول ما تخرجى علشان ميحصلش تساقط وبعد 5 دقايق تسرحيه وهيكون لسة مبلول برده نشفي بالسيشوار بقا و اوعى تسيبيه ينشف وهو متنعكش لازم ينشف وهو متسرح ومفرود وسايب

👧تالت حاجة بقى الترطيب الكويس ، يعنى إيه؟؟
يعنى لازم شعرك يكون رطب لان الجفاف بيخلى الشعرة تنشف وتتكسر والجفاف عموما غلط على الشعر سواء معمول بروتين ولا ﻷ و دايما اهتمى بنهايات شعرك لأنها بتكون اكتر جزء باين فيه التقصيف و ده لأنه مش بيوصلوا غذا من فروة الراس وبيكون شبه ميت وكل ما الجفاف بيزيد تقصيف الشعر بيزيد و التقصيف اللى بتكلم عنه اللى هو تشقيق الشعرة وتحسى ان الشعر حتى لو معمول بروتين بتلاقى اطرافه مفرودة بس ناشفة وبتشوك و دى علاجها الترطيب ومش كفاية تستخدمى السيرم وبس لازم حمام كريم نوعه كويس جدا واهتمى بالاطراف جدا زى ما قولت وكل ما نوع السيرم و وحمام الكريم والشامبو كويسين وانواعهم نضيفة كل ما الشعر حالته بتكون احسن

🙌رابع حاجة لو هتسافرى مصيف او بتدربى سباحة مينفعش تنزلى البحر او البيسين من غير البونيه لان الاملاح والكلور عدوة البروتين
يعنى قبل ما تنزلى المية ادهنى شعرك سيرم او حمام كريم ولفيه كويس والبسى عليه البونيه المخصوص للسباحة اللى هو زى الجلد عارفينه طبعا و فايدة الدهانات دى بتحمى الشعر علشان لو لا قدر الله المية اتسربت من تحت البونيه يبقى الشعر متغلف وعليه طبقة تحميه

🙆خامس حاجة من الافضل متربطيش الشعر بتوكة استك علشان متعلمش فيه ولو عاوزة تلميه يبقى حطى توكة مشبك اللى بتتفتح وتتقفل دى

🙅سادس حاجة اوعى شعرك يكون فيه قشر تقومى غسلاه بخل مثلا لانه ساعتها هتلاقى شعرك رجع زى الاول والبروتين اتكسر وبرده اى شامبو ضد القشرة هيكسر البروتين من شعرك وبلاش تستخدمى حاجة متعرفيش تأثيرها على شعرك هيكون ايه الا لما تسألى حد متخصص ويفيدك

💁سابع حاجة ومهمة جدا فى الجو الحر العرق
و العرق يعنى املاح والاملاح غلط جدا على البروتين فنحاول بقدر الامكان واحنا خارجين نلف اى حتة قماشة قطن على الرقبة علشان الشعر ميبقاش لازق فى الجلد والعرق يبله ويخليه يموج من عند الرقبة بسرعة وياريت متكتميش شعرك لفترات طويلة بالحجاب
يارب الجميع يستفيدوا 😍😍😍