Safa7 El Fat Friends

استهلاك التمر في رمضان بيوصل لارقام خيالية مقارنة بباقي السنه 😊
وهو حاجة كويسه عموما لانه في بوتاسيوم مغنسيوم والياف مادام الاستهلاك في الحدود المنطقية،
الانسان عموما ليه يوميا ٣٥ ج سكر للرجل و ٢٥ ج سكر للست
التمره الواحده حوالي ٤،٥ ج سكر لو وزنها ٧ جرام تقريباوالتمر زيه زي اي اكل في الدنيا لو اكلته في حدود سعراتك تمام والنسب اليومية مقارنة بمجهودك،
٢٠ ل ٢٥ جرام تمر مناسب للي هدفه يخسر دهون.

الناس اللي عايزه تنجز في رمضان في خسارة الدهون نصيحتي ليك ابعد عن السكر اغلب الشهر بكل انواعه سواء من الفاكهة او الحلويات، بس مين يقدر بقى , انا شخصيا بعت اجيب كنافة عالفحم 😂

عارف لو مش بتعطش ولا بتشرب ميه كفايه في رمضان في الغالب هاتخرج من رمضان وانت زايد كام كيلو محترمين!
عارف ليه؟
علشان ده معناه انك بتاكل كم كاربوهيدريتس " نشويات" كبير وده مش بيخليك تحس بالعطش
لان كل ١ جرام نشويات بتاكله بيدخل قدامه من ٣ ل ٤ جرام ميه وعلشان كده في ناس مش بتشرب ميه تقريبا بالايام وده بسبب ان اكلهم مرتفع جدا في النشويات.
وطبعا حلويات رمضان هي خليط سحري من النشويات و الدهون الغير صحيه ، انچوي ..

الصوره ملهاش علاقه بالموضوع بس انا بحب البسبوسه😎


طبعا الناس اللي جابت كحك العيد اول يوم رمضان الكلام مش موجه ليهم ولا الصفحه كلها 😏

جربت تعيش قبل كده من غير عيش ، جربت تاكل بالشوكه؟
بيعدي عليا شهور من غير عيش او منتجات قمح بكل مشتقاته ،
فطار لطيف ٣ بيضات وبطاطسايه صغيره ومعلقه صغيره زيت زتون .
البطاطس بحطها في الميكرويف ٦ دقايق واقطعها واحطها مع البيض بس كده😊
وجبه متكامله العناصر بروتين نشويات و دهون ..
وبالمناسبه مفيش حاجه اسمها اكل بيتخن واكل يخسس كله واحد الكميه هي الاساس ..
صباحكم خير😊


ابو بسكوته وكوبايه النسكافيه شايفك وهاجيبك و هاعصرك انزل منك كوكيز صغننين😒

Carolyn Hartz
استراليه عمرها 70 سنه بقالها 28 سنه ماكلتش سكر وكل الاكل المصنع اللي بيدخل في تكوينه .
بتراقب كميات اكلها بتنام 8 ساعات بتلعب رياضه يوميا بس كده
انا مارضتش احطلكم صورها بالمايوه علشان رمضان وعلشان مااحطمش نفسية الستات,
لانها جسمها كما لو امرأه في الاربعين مقارنة بالاوروبيات او جسم فتاه في العشرينات مقارنة بالعربيات ، ومن غيرماتقولي يااختاه منك ليها , فاهمين ان الست دي كده علشان دول اجانب وحياتهم انضف ومعاهم فلوس ومعندهمش مشاكل ورجالتهم بيساعدوهم و العيب مش على حلة المحشي اليوميه ومشنه العيش وشوال فطاير اللبنه و زعترات الماما و وصفات الشيف شربيني والست غاليه العيب على مشاغل العيال وابوهم وشغل البيت ..
😊😊

صباح النور و الرضا
لو اقتنعت ان خسارة الوزن هي رحلة
صدقني هاتستمتع كل يوم بيها من اكتشاف طرق جديدة للاكل والرياضه
وهايتفتح قدامك ابواب اهتمامات تانية واسباب سعادة غير الاكل

🍳🎏
جربت بيض بالتونة قبل كده ؟
جربه هاتنبسط😊
تنفع فطار غدا عشا
تنفع قبل التمرين بعد التمرين
٣ بيضات ونص علبة تونة، ومعلقة صغيرة زيت زتون ، حوالي ٣٠ ج بروتين و ١٥ ج دهون
اوقات كتير لما اتمرن الصبح باخدها قبل التمرين بساعة ونص ومن غير كاربوهيدريتس لو العشا في اليوم اللي فات في كارب عالي وبليل متاخر

عارفين الناس اللي مصدقه ان الاكل بليل بيتخن
وان غلط الاكل قبل النوم بحاجه بسيطه وبيتخن برضه
وان اكل النشويات بليل بيتخن
وان ماينفعش ناكل نوعين بروتين في وجبه واحده
وان الواحد لازم ياكل زبادي بالمون بليل علشان يخس
وان الرياضه تتلعب بالنهاراحسن و الرياضه بليل ما بتخسسش اوي
هما هما نفس البني ادمين
اللي في رمضان بياكلو بليل فطار الساعه 7 و كله نشويات و بليل في السحور فول وعيش وبيض وسكريات وعصاير
وبيخلطو عشر انواع بروتين مع بعض
وبيتسحرو قبل النوم مباشره
ومابياكلوش زبادي بالمون
هم برضه اللي في منهم بيطلعو من رمضان نازلين في الوزن .
الناس تموت في الخرافات والاساطير المشكله ان الخرافات دي بتتكسر كلها بلا استثناء في شهر رمضان وبرضه لا حياة لمن تنادي ,,

الانسان عدو نفسه فعلا..
الخلاصه ركز كده في رمضان وهاتلاقي انك عايز تنزل وتستغل الصيام في نزول الوزن وفعلا في ناس بتنجح في ده بالرغم انه بيعمل عكس كل الاساطير اللي ناس كتير مؤمنه بيها جدا ..

الحكايه سعرات فقط ومجهود لحرقها مع اختيار التوقيت المناسب لكل نوع اكل.

هل الصيام المتقطع له علاقه مباشرة في خسارة الوزن؟
الاجابه " لا"
لان خسارة الوزن مرتبطة ارتباط وحيد بعدد السعرات الداخله جسم الانسان من الاكل والشرب و المجهود المبذول ، فاذا كان اكلك اقل من احتياجك من الطاقه خسرت وزن و العكس يؤدي للسمنة.

لكن الصيام المتقطع و الصيام عموما هو تهذيب للنفس و للجسم
بيخليك تاكل في اوقات ثابته مناسبه لطبيعه حياتك
بيخلي تحكمك في الشهية عقلاني اكتر
بيقلل عدد الوجبات .

تاني اقولك الصيام المتقطع حلو لامور متعدده لكن مش سبب مباشر لخسارة الوزن.
والدليل ناس كتير طبيعه شغلها بتخليها ماتاكلش غير وجبه واحده اخر اليوم مثلا وبتزيد
و الناس في رمضان بتطلع زايده برضه😊..

اخيرا طريقه عمل الصيام المتقطع
كبدايه ١٤ او ١٦ ساعه بدون طعام لكن مسموح كل المشروبات خاليه السعرات
وبعد كده بتاكل في حدود ٨
ساعات اي كان الوقت تقدر تعملها مش مرتبط بتوقيت في اليوم.

اه و الدخان عادي في الصيام
علشان حد كان سالني هو الشيشه العنب بتتخن😒

---المنطقة المريحة---
مشاكل الدقيق الابيض من زياده الوزن وحصاوى الكلى..

comfort zone

دي منطقه سعادتك في الاكل في ناس سعادتها في الخبز بانواعه في ناس في الحلويات في ناس في الاكل الدسم وفي ناس بتاكل الاخضر و اليابس بغض النظر عن ايه هو الاكل..
النهارده هاتكلم عن الدقيق واشهر منتجاته زي الخبز او العيش المعجنات بانواعها كوراسون باتيه مناقيش لبنات فطاير كيك بسكوت وهو بيدخل في اي حاجه تتخيلها ..
اولا ايه تأثير العجين او مشتقات الدقيق على زياده الوزن
كل 3 معالق دقيق او طحين لاخواتنا الشوام بتعمل 80 ل 90 سعر حراري و الدقيق الاسمر نفس السعرات لكن اغنى في الالياف.
المناقيش او الفطاير الصغيره او الباتيهات كمثال بتبدا من 100 سعر حراري ولحد 500 او 700 سعر حسب المحتوى من زيت وسمسم وملح وسكر وجبن او لحم. بالاضافه انها بتتعمل من زيوت نباتيه مهدرجه.
المعجنات الحلوة اللي مضاف عليها مربى فاكهه بالشربات شوكلاته او كريمه دي كارثه غذائية لان خلط الدهون مع السكريات من اسوأ الحاجات اللي تعملها في جسمها نظرا لرفع الانسولين مع ادخال دهون بيبطيء جدا عمليه الحرق وبيرفع عملية التخزين وشحن مخازن الطاقه في الكبد والفائض يخزن كدهون.
وكل انواع الاكل المشتقه من دقيق بتتحول لسكر او جلوكوز في الجسم سواء عيش ابيض او بلدي او توست ابيض ومع الوقت من مسببات مقاومة الانسولين وبيحصل تركيز للدهون في المنطقه العليا خصوصا من الجسم زي الصدر و البطن و الذراعين والضهر والضهر من تحت الابطين للنساء.
وطبعا في فروق بين الناس في اكتر بتتخزن الدهون في المنطقه السفلى من الجسم.
العيش الابيض لا يفرق عن الاسمر في كل المكونات الا انه مليء بالالياف قليلا واقل سرعه في رفع الانسولين بسبب الالياف
لكن مع الاستخدام بكثره ممكن يبقى مسبب للسمنه عادي. ,وبالمناسبه اكل النشويات المكرره البيضاء بيسبب حصاوي الكلى
تجعل الجسم ينتج مستويات عالية من الأنسولين، مما يسبب الكالسيوم من العظام حتى ينتهي في المسالك البولية

تخلص من الدقيق ومشتقاته اذا بتعافر بقالك فتره وبتعاني من ثبات الوزن او عدم تحسن شكل الجسم بالرغم من ممارستك للرياضه و الدايت.
استبدلهم بالخضروات والخضار نشويات , ثم الشوفان . ثم بالارز البني بالبطاطا و البطاطس واخيرا الفاكهه

المصادر:
وزارة الغذاء و الزراعة الامريكية
https://goo.gl/592Cvc

الانسولين، جلوكوز ، جليكوچن " مخازن الطاقه في الكبد و العضلات" دول ال ٣ مفاتيح الاساسيه في الجسم لتحويل الاكل يا طاقه مستخدمه محروقه كمصدر للنشاط او لكتله عضلية او دهون مخزنه،

مقاومة الانسولين يعني جسمك بيفرز انسولين لنقل السكر في الدم بعد ماتحول لجلوكوز بسبب اكلك لنشويات عاليه لكن خلايا الجسم او المستقبلات مش بتقبل الجلوكوز ده فا يترفع الجلوكوز في الدم ويبدأ تخزين الدهون و بيترافق مع وجود دهون ثلاثيه في الجسم بنسبه عاليه.

ازاي تستخدم التلات عناصر اللي قلناهم فوق لصالحك:

١- قلل الكاربوهيدريتس
٢- زود بروتين ودهون صحيه

٣- نزل دهون جسمك العب رياضه، ميكس بين كارديو وتمارين باوزان

القاعده الاساسيه لحجم الكارب :
🥛🥑🍏🍅🥗نشاط يومي بسيط وعمل مكتبي او منزلي بدون رياضه 50 ج الي 80 نشويات كافي لاغلب الناس. ويفضل تكون من الخضروات وليس من العيش والارز البقوليات الخ..

🥛🥑🍅🥔🍎🥗نشاط متوسط ورياضه وعمل مكتبي،80 الي 100 جرام نشويات كافي خليط من الخضروات والنشويات المعقده بطاطا بطاطس شوفان والاغلبيه للخضروات.

🥛🍚🥑🥔🍠🍏🍌🥗نشاط رياضي عالي و عمل مكتبي او متحرك، من 90 الي 120 ج نشويات قابلين للزياده في حاله الاهتمام ببناء عضلي مع نزول الدهون
خليط من الخضروات والنشويات المعقده.

صباح الخير
٧ دقايق من الرياضة السريعة المكثفة الصبح للناس المشغولة و للي عايز يشغل الحرق بشكل قوي بدري تقدر تعمله قبل الفطار, ولو هاتعمله بعد الاكل يكون بساعه ونص.

تعمل كل تمرين في الصورة ٣٠ ثانية وتريح ١٠ ثواني وتخش على اللي بعده.
كرر المجموعة كلها ٣ مرات.
ابتدي باللي تقدر عليه مش شرط تعمل كل التمارين من اول يوم ومش شرط تعملهم في 30 ثانية وممكن تريح اكتر من 10 ثواني, بس خلي الهدف بتاعك ان بعد شهر مثلا تقدر توصل لده
ينفع للستات و الرجالة والعيال الصغيرة و الحيوانات الاليفة.