LPST 78 TV online

ក្រុមការងារព័ត៌មាននិងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ ផ្សាយមុននេះបន្តិចថា ថ្មីៗនេះមានការផ្សព្វផ្សាយតាមសារព័ត៌មាននៅលើបណ្តាញសង្គមដោយស្រ្តីម្នាក់ចោទថាមានសមត្ថកិច្ចចាប់ប្តីគាត់ចូលក្នុងឡានគ្មានមូលហេតុ នៅខណ្ឌព្រែកព្នៅ។

ចំពោះករណីនេះ ក្រុមការងារព័ត៌មាននិងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ សូមបញ្ជាក់ជូនសាធារណជនឲ្យបានជ្រាបថា:នៅថ្ងៃទី១៧ ខែកក្កដា ឆ្នាំ២០២៦ វេលាម៉ោង១១ និង៣០ នាទី កម្លាំងការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញ បានឃាត់ខ្លួនជនសង្ស័យចំនួន០១នាក់ នៅចំណុចបុរីភូមិសំរោងផ្ទះលេខLB១២ ផ្លូវលេខ៦២ សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ តាមដីកាបញ្ជាឲ្យចូលខ្លួនលេខ២៥៣ អ.យ.ក ចុះថ្ងៃទី២៦ ខែមិថុនាឆ្នាំ២០២៦ ចេញដោយឯកឧត្តម ច្រឹង ខ្មៅ ព្រះរាជអាជ្ញា នៃអយ្យការអមសាលាដំបូងរាជធានីភ្នំពេញ ពាក់ព័ន្ធករណី ឆបោកនិងរំលោភលើទំនុកចិត្ត។

ជនសង្ស័យឈ្មោះ ចៅ សូវិចិត្រ ហៅ សារី សូវិចិត្រ ហៅ សូរ ភេទប្រុស កើតឆ្នាំ១៩៨៧ ជនជាតិខ្មែរសមត្ថកិច្ចចុះអនុវត្តឃាត់ខ្លួននៅខាងមុខផ្ទះរបស់ជនសង្ស័យខណៈដែលកម្លាំងគណៈបញ្ជាការឯកភាព រដ្ឋបាលខណ្ឌព្រែកព្នៅបានចុះធ្វើការងាររដ្ឋបាលសម្រង់ស្ថិតិ នៅចំណុចផ្ទះរបស់ជនសង្ស័យ។

បច្ចុប្បន្នជនសង្ស័យ ខាងលើ កំពុងឃាត់ខ្លួននៅការិយាល័យនគរបាលព្រហ្មទណ្ឌកម្រិតស្រាលដើម្បីចាត់ការតាមនិតិវិធី៕

#សារពិសេស ៖ សម្ដេចតេជោ ហ៊ុន សែន ប្រមុខរដ្ឋស្ដីទីនៃកម្ពុជា បានផ្ដល់យោបល់ជូន នាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃ ត្រូវបង្ក្រាបឱ្យបាន Scam Online ពិសេសត្រូវសួរចម្លើយក្រុម Scam Online ដែលបានចាប់ហើយ សង្កត់សួរថាតើចូលតាមណា ? លើសពីនេះ សម្ដេចតេជោ បានសង្កត់ធ្ងន់ថា ការបង្ក្រាប Scam Online គឺត្រូវដើរទន្ទឹមនឹងការបង្ក្រាបចំពោះមន្ត្រីពាក់ព័ន្ធ ដោយត្រូវដកតំណែង និងអនុវត្តច្បាប់តែម្ដង និងចំណែកមន្ត្រីមិនព្រមអនុវត្ត គឺត្រូវដកតំណែង។

សម្ដេចតេជោ បានលើកឡើងខាងលើ នៅក្នុងឱកាសនៃការជួបសំណេះសំណាលជាមួយថ្នាក់ដឹកនាំក្រសួង ស្ថាប័ន ក្រុមប្រឹក្សារាជធានី ខណ្ឌ សង្កាត់ មន្ទីរ អង្គភាពនានាជុំវិញរដ្ឋបាលរាជធានីភ្នំពេញ។

រាជធានីភ្នំពេញ, ថ្ងៃអាទិត្យ ៨កើត ខែជេស្ឋ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២៤ ខែឧសភា ឆ្នាំ២០២៦