MedNews mn

ЭРҮҮЛ МЭНДИЙН САЛБАРЫН ЗАЛУУЧУУДЫН ХОЛБОО БАЙГУУЛАГДЛАА

Монголын эрүүл мэндийн салбарт анх удаа залуу үеийн эмч, сувилагч, эрүүл мэндийн байгууллагын ажилтан, судлаач, салбарын залуу мэргэжилтнүүдийг нэгтгэсэн “Эрүүл мэндийн салбарын залуучуудын холбоо” байгуулагдлаа. Энэхүү холбоо нь эрүүл мэндийн салбарын залуучуудын манлайлал, оролцоог нэмэгдүүлэх, хамтын ажиллагааг бэхжүүлэх, мэргэжлийн хөгжил, шинэ санаачилгыг дэмжих, залуу үеийн дуу хоолойг салбарын бодлого, шийдвэр гаргах түвшинд хүргэх хэрэгцээ, шаардлагад үндэслэн байгуулагдаж буйгаараа онцлог юм.

Тус холбоо нь эрүүл мэндийн салбарт ажиллаж буй залуу мэргэжилтнүүдийг нэгтгэж, мэдлэг, туршлага солилцох, манлайлах ур чадварыг хөгжүүлэх, судалгаа, инновац, сайн дурын үйл ажиллагааг дэмжих, үндэсний болон олон улсын байгууллагуудтай хамтын ажиллагааг өргөжүүлэх чиглэлээр үйл ажиллагаагаа явуулах юм. Мөн салбарын залуу боловсон хүчний санал санаачилгыг бодит ажил хэрэг болгон хэрэгжүүлэх, хамтын ажиллагааны нэгдсэн тогтолцоог бүрдүүлэх, ирээдүйн манлайлагчдыг бэлтгэхэд чиглэсэн төсөл, хөтөлбөрүүдийг хэрэгжүүлэхээр зорин ажиллана.

Өнөөдөр эрүүл мэндийн салбарын тогтвортой хөгжил нь зөвхөн эмчилгээ, үйлчилгээний чанараас гадна хүний нөөцийн чадавх, залгамж халаа, шинэ үеийн манлайлагчдыг төлөвшүүлэхтэй салшгүй холбоотой болсон. Иймээс салбарын залуучуудыг нэгтгэсэн энэхүү холбоо нь тэдний оролцоог нэмэгдүүлэх, хамтын ажиллагааг өргөжүүлэх, шинэ санаа, инновацыг бодит ажил хэрэг болгох чухал гүүр болох юм.

“Эрүүл мэндийн салбарын залуучуудын холбоо” байгуулагдсанаар салбарын залуу мэргэжилтнүүд нэгдсэн зорилго, үнэт зүйлтэйгээр хамтран хөгжих, туршлага солилцох, мэргэжлийн болон манлайллын ур чадвараа дээшлүүлэх шинэ боломж бүрдэхээс гадна эрүүл мэндийн салбарын хүний нөөцийн тогтвортой хөгжлийг дэмжих, ирээдүйн манлайлагчдыг бэлтгэхэд бодит хувь нэмэр оруулах ач холбогдолтой юм.

УНТЭ-ийн удирдлагуудыг гэрээтэй холбоотой асуудлаар шалгаж эхэлжээ

Эх сурвалжийн мэдээлснээр, Улсын нэгдүгээр төв эмнэлгийн удирдлагатай холбоотой шалгалтын ажиллагаа эхэлсэн байна.

Тодруулбал, өчигдөр тус эмнэлгийн ерөнхий захирлын үүргийг гүйцэтгэгч П.Анхтуяагийн албан өрөөнд Авлигатай тэмцэх газрын алба хаагчид нэгжлэг хийж, мөрдөн шалгах ажиллагааны хүрээнд саатуулсан гэх мэдээлэл байна.

Мөн энэ хэрэгтэй холбоотойгоор Захирлын ажлын албаны дарга Ц.Амаржаргал, мэс заслын эмч С.Отгонбаяр нарыг ч шалгаж байгаа аж.

Эх сурвалжийн мэдээлснээр, Авлигатай тэмцэх газрын арав орчим хүний бүрэлдэхүүнтэй ажлын хэсэг Улсын нэгдүгээр төв эмнэлэгт ажилласан бөгөөд мөрдөн шалгах ажиллагаа нь гэрээ, худалдан авалттай холбоотой асуудлын хүрээнд үргэлжилж байгаа гэх мэдээлэл байна.

Албаныхан энэ талаар одоогоор албан ёсны тайлбар мэдээлэл өгөөгүй бөгөөд мөрдөн шалгах ажиллагаа үргэлжилж байгаа тул дээрх мэдээллийг албан ёсоор баталгаажуулах боломжгүй байна.
Эх сурвалжийн мэдээллээр, зөвхөн Улсын нэгдүгээр төв эмнэлэг бус, гуравдугаар шатлалын зарим эмнэлгийн удирдлагуудтай холбоотой шалгалтын ажиллагаа мөн байга гэх мэдээлэл байнө. Эдгээр асуудлын талаар бид албан ёсны эх сурвалжаас тодруулан, баримтад тулгуурласан мэдээллийг цувралаар хүргэх болно.

Монгол Улсад хөхний хорт хавдраас урьдчилан сэргийлэх цогц мэс заслыг анх удаа хийлээ

Гений (BRCA) мутацийн улмаас хөхний хорт хавдраар өвчлөх маш өндөр эрсдэлтэй өвчтөнд урьдчилан сэргийлэх зорилгоор хоёр талын эрсдэл бууруулах мастэктоми (Bilateral Risk-Reducing Mastectomy) болон өөрийн эдээр хөхийг нөхөн сэргээх DIEP flap мэс заслыг Бүгд Найрамдах Чех Улсын нөхөн сэргээх мэс заслын багтай хамтран Монгол Улсад анх удаа амжилттай хийлээ.

12 цаг үргэлжилсэн энэхүү нарийн төвөгтэй мэс засал нь хөхний хорт хавдраас урьдчилан сэргийлэхийн зэрэгцээ өвчтөний амьдралын чанар, биеийн хэвийн төрх, гоо сайхны үр дүнг хадгалах боломжийг бүрдүүлсэн өндөр түвшний цогц эмчилгээний жишээ боллоо.

Мэс заслыг Хавдар судлалын үндэсний төв-ийн Хөхний төвийн Батсүх Ж. ахлагчтай мэс заслын баг Бүгд Найрамдах Чех Улсын нөхөн сэргээх мэс заслын эмч, мэргэжилтнүүдтэй хамтран амжилттай гүйцэтгэсэн юм.

Энэхүү хамтарсан ажиллагаа нь Монгол Улсад хөхний хорт хавдраас урьдчилан сэргийлэх болон нөхөн сэргээх мэс заслын тусламж үйлчилгээг хөгжүүлэх, олон улсын дэвшилтэт арга технологийг нутагшуулахад чухал ач холбогдолтой үйл явдал болж байна.

Монголын болон Чехийн хамтарсан багийн эмч, мэргэжилтнүүддээ баяр хүргэж, цаашдын эрдэм судлал, эмчилгээний ажилд нь өндөр амжилт хүсье.

ШУТИС-ийн багш Д.Сэрдарам: ЭЕШ-ээ өгсөн хүүхдүүддээ баяр хүргэе! Сайхан амьсгаа аваад амар, амар! Хоёр зөвлөгөө өгий!
1. Битгий ГАП ав! "Сиймхий ч гэсэн гэр минь" гэдэг шиг улсын хэдэн сургуульдаа ор! Мэргэжил таарахгүй бол мэргэжил дөхүүд нь ор! Эхлээд ХҮН болсны дараа нь Мэргэжил
2. 40-60 хувийн тэтгэлэгтэй сургууль олчихоод "заавал гадаад явна" гэж аав, ээжийгээ бүү шаналга. Ихэнх нь "наашаа ч үгүй, цаашаа ч үгүй" болгодог занга шүү!!! 100 хувийн тэтгэлэг, баталгаа хар! Чадаагүй бол харамсаж уйлж унжаад хэрэггүй. Чи ЗӨВ байвал боломж, сонголтууд зөндөө гарна. Гадаадад сурах бүх асуудлын шийдэл биш! Мастераа тэнд хий!
Та нартаа амжилт хүсье. Амжилт гэдэг заримдаа буруу шийдвэр яаран гаргахгүй байхыг хэлдэг гэж байна!

19 настай өвчтөнийг аварч чадалгүй, амьсгал хураасных нь дараа эмч сэтгэлийн хөдөлгөөнөө барьж дийлэлгүй эмнэлгээс гарчээ. Тэрхүү зүрх зүсэм мөчийг түргэний нэгэн эмч гэрэл зурагт буулгаж амжсан байна. Зурагт эмч сөхрөн сууж, цээжиндээ хургасан өвдөлтийг давах буюу болж өнгөрсөн хүнд үйл явдлын ачааг туулах оролдлого нь үлджээ. Яаралтай тусламжийн тасгийн маш хурдтай, завгүй хэмнэл дунд гашуудах хугацаа тэр бүр олддоггүй ч, энэ нь эндэгдлийн өвдөлтийг өчүүхэн ч болов хөнгөлдөггүй билээ.
Хэдэн минутын дараа тэрээр босож, гүнзгий амьсгаа аваад буцаад ажилдаа орсон юм. Учир нь дараагийн өвчтөнд ч гэсэн түүний тусламж хэрэгтэй байлаа. Энэхүү гэрэл зураг нь эмч нарын өдөр бүр үүрч явдаг сэтгэл зүйн асар том ачааг бидэнд сануулж байна. Тэд амьдрал, үхлийн заагтай тасралтгүй нүүр тулж, гарз хохирол бүрийг зүрхээрээ мэдэрдэг ч өөрийн үүрэг хариуцлагаа үргэлжлүүлэн биелүүлсээр байдаг билээ.

Засгийн газрын хуралдаанаар наадмын амралтыг 10 хоног болгох шийдвэр гарлаа

ЦЭНХЭР ЗАЛАА- НААС “СЭТГЭЛИЙН ЖИГҮҮР” ХҮРТЭЛ “СОЁЛ-ЭРДЭНЭ”-ИЙН 55 ЖИЛИЙН ОЙН ТОГЛОЛТ

Монголын рок, поп хөгжмийн урлагийн хөгжилд үнэтэй хувь нэмэр оруулж, олон арван жилийн турш үзэгч сонсогчдын хайр хүндэтгэлийг хүлээсэн домогт “Соёл-Эрдэнэ” хамтлагийн 55 жилийн ойн хүндэтгэлийн тоглолт 2026 оны зургаадугаар сарын 28-ны өдөр Д.Сүхбаатарын талбайд зохион байгуулагдах гэж байна.

“Нийслэл Улаанбаатар хотын иргэдийн өдөр – Хүрээ Цам Даншиг наадам-2026” арга хэмжээний хүрээнд болох энэхүү тоглолт нь Монголын рок, поп хөгжмийн түүхийг бүтээлцсэн үе үеийн шилдэг уран бүтээлчдийг нэгэн тайзнаа чуулах онцгой үйл явдал болж буйгаараа онцлог юм.

Тоглолтод Монголын хөгжмийн ертөнцөд өөрийн гэсэн өнгө төрх, бүтээлээрээ тод мөр үлдээсэн “Соёл-Эрдэнэ”, “Өргөө”, “Хонх”, “Niciton”, “Шар айраг”, “Дэлхий”, “Nisvanis”, “The Lemons” зэрэг хамтлагууд оролцож, үзэгч түмэндээ сор болсон бүтээлүүдээ хүргэнэ.

Мөн Монгол Улсын Ардын жүжигчин Д.Жаргалсайхан, Монгол Улсын Гавьяат жүжигчин Ч.Насантогтох, Х.Лхагвасүрэн, Я.Одсүрэн, С.Бархас, С.Наран, Ж.Алтанцэцэг зэрэг нэрт уран бүтээлчид ая дуугаа өргөж, хөгжмийн урлагийн олон үеийн төлөөлөл нэгэн үдшийн турш чуулах юм.

Энэ үеэр “Цэнхэр залаа”, “Анхны хайрын дуу”, “Сансрын хөлөг”, “Хотын гэрэлт гудамж”, “Арван найман нас минь намайг бүү орхиоч”, “Тэмээн жингийн цуваа”, “Сэтгэлийн жигүүр” зэрэг Монголын хөгжмийн алтан санд багтсан бүтээлүүд төв талбайд эгшиглэж, үзэгчдийг дурсамж, уянга, омогшлоор дүүрэн үдэштэй учруулах болно.

1971 онд байгуулагдсан “Соёл-Эрдэнэ” хамтлаг нь Монголын орчин үеийн эстрад, рок, поп хөгжмийн хөгжлийн шинэ үеийг эхлүүлж, олон арван хит бүтээлээрээ хэд хэдэн үеийн сонсогчдыг хүмүүжүүлсэн түүхтэй. Тиймээс 55 жилийн ой нь зөвхөн нэг хамтлагийн баяр бус Монголын хөгжмийн урлагийн түүхэн замналыг эргэн дурсах, залгамж үеийн холбоог бэхжүүлэх соёлын томоохон арга хэмжээ болж байна.

Тоглолт зургаадугаар сарын 28-ны өдөр 20:00 цагаас Д.Сүхбаатарын талбайд эхлэх бөгөөд нийслэлчүүд болон хөгжмийн урлагт хайртай бүхэнд үнэ төлбөргүй нээлттэй хүрэх юм.

Таван арваныг дамжин эгшиглэсэн аялгуу, үе үеийн оддыг нэгэн тайзнаа нэгтгэсэн энэ үдэш Монголын хөгжмийн түүхийг төв талбайд дахин амилуулах болно.

Э.БАТШУГАР: ЭМЧ НАРЫГ ТАЙЛАНГААС ЧӨЛӨӨЛЖ, ЦАХИМЖИЛТЫГ ЭРЧИМЖҮҮЛЖ БАЙНА

Ерөнхий сайд Н.Учралын санаачилсан “Чөлөөлье” санаачилгын хүрээнд өрхийн эмч нарыг олон төрлийн тайлан, бичиг цаасны ажлаас үе шаттайгаар чөлөөлж, иргэддээ үзүүлэх тусламж үйлчилгээндээ илүү төвлөрөх боломжийг бүрдүүлж байна.

Эрүүл мэндийн сайд Э.Батшугар Баянзүрх дүүргийн 26 дугаар хорооны “Тэгш дүүрэн итгэл” Өрхийн эрүүл мэндийн төвд ажиллаж, эмч, мэргэжилтнүүдийн саналыг сонсож ажлын хэрэгжилттэй танилцлаа.

Мөн анхан шатны тусламж үйлчилгээний чанар, хүртээмжийг сайжруулах зорилгоор өрхийн эрүүл мэндийн төвүүдийн санхүүжилтийг нэмэгдүүлэх бодит арга хэмжээнүүдийг хэрэгжүүлж байна. Тухайлбал, хүн амын тоонд суурилсан норматив санхүүжилтийг 30 хувиар нэмэгдүүлсэн. Түүнчлэн эрэгтэйчүүдийн өвчлөл, нас баралтыг бууруулах зорилтын хүрээнд урьдчилан сэргийлэх үзлэг, оношилгоонд хамруулсан үр дүнгээс хамаарч өрхийн эмнэлгүүдэд 110 хүртэлх хувийн гүйцэтгэлийн санхүүжилт олгох нөхцөлийг бүрдүүлээд байна.

МОНГОЛЫН САГСАН БӨМБӨГИЙН ТҮҮХЭН МӨЧ: Ш.ЭНХИЙН-ОД NBA-ИЙН ДРАФТАД НЭРЭЭ ДЭВШҮҮЛЛЭЭ

Монголын сагсан бөмбөгийн тамирчин Ш.Энхийн-Од дэлхийн хамгийн нэр хүндтэй сагсан бөмбөгийн лиг болох NBA-д хүч сорих боломжийн өмнө ирээд байна. Тэрээр NBA-гийн 2026 оны драфтад албан ёсоор нэрээ дэвшүүлснээр Монголын сагсан бөмбөгийн түүхэнд шинэ хуудсыг нээж буй онцлох үйл явдлын эзэн болоод байна.

Ш.Энхийн-Од АНУ-д боловсрол эзэмшихийн зэрэгцээ спортын замналаа амжилттай үргэлжлүүлж, өндөр түвшний өрсөлдөөн дунд өөрийн ур чадвар, авьяас чадвараа батлан харуулсаар иржээ. Түүний тоглолт, өсөлт хөгжлийг NBA-гийн багууд анхааралтай ажиглаж, бэлтгэл сургуулилтад урин оролцуулсан байна.

АНУ-ын мэргэжлийн сагсан бөмбөгийн NBA-гийн 2026 оны драфт зургаадугаар сарын 23-24-ний өдрүүдэд Нью-Йорк хотын Barclays Center-т зохион байгуулагдана. Энэ жилийн драфтад нэрээ албан ёсоор дэвшүүлсэн түүнийг Los Angeles Lakers, Milwaukee Bucks, Dallas Mavericks, Orlando Magic, Memphis Grizzlies багууд бэлтгэлдээ урьж оролцуулжээ.

Монголын тамирчин дэлхийн хамгийн өрсөлдөөнтэй спортын лигүүдийн нэг болох NBA-д тоглох боломжийн төлөө өрсөлдөж байгаа нь зөвхөн хувийн амжилт төдийгүй Монголын сагсан бөмбөгийн хөгжил олон улсын түвшинд хүрч буйн илэрхийлэл болж байна.

Монголын сагсан бөмбөгийн түүхэнд шинэ зам мөр гаргаж буй залуу тамирчиндаа нийт Монголчууд амжилт хүсэж, түүний дараагийн алхмыг догдлон хүлээж байна.

🔵ДЭЛХИЙН ЖИШИГТ НИЙЦСЭН 512 ЗҮСЛЭГТ ТОМОГРАФ АШИГЛАЛТАД ОРЖ, ЗҮРХ, ТАРХИНЫ ЭМГЭГИЙГ СЕКУНДИЙН ДОТОР ОНОШЛОХ БОЛОМЖ БҮРДЛЭЭ

Өвчнийг эрт үе шатанд нь илрүүлэх, оношилгооны нарийвчлалыг сайжруулах, эмчилгээний зөв тактикийг богино хугацаанд тодорхойлох боломжийг нэмэгдүүлсэн дэвшилтэт технологийг Улсын гуравдугаар төв эмнэлэг үйл ажиллагаандаа нэвтрүүллээ. Төр, хувийн хэвшлийн хамтын ажиллагааны хүрээнд тус эмнэлэг хиймэл оюун ухаанд суурилсан, өндөр хүчин чадал бүхий Neusoft NeuViz Epoch 512 зүслэгт компьютер томограф төхөөрөмжийг ашиглалтад оруулснаар иргэд эх орондоо дэлхийн жишигт нийцсэн дүрс оношилгооны тусламж үйлчилгээг авах боломж нэмэгдэж байна.

Дэлхийн хамгийн сүүлийн үеийн технологийн шийдлийг шингээсэн энэхүү төхөөрөмж нь зүрх судас, тархи мэдрэл, гэмтэл болон бусад эрхтэн тогтолцооны эмгэгийг богино хугацаанд өндөр нарийвчлалтай оношлох хүчин чадалтай. Тухайлбал, зүрхний дүрслэлийг дунджаар 0.259 секундэд, бүтэн биеийн судасны шинжилгээг ойролцоогоор тавхан секундын хугацаанд гүйцэтгэх боломжтой бөгөөд энэ нь яаралтай тусламж, хүнд болон хүндрэлтэй тохиолдлын оношилгоонд чухал ач холбогдолтой юм.

Мөн төхөөрөмжид суурилсан хиймэл оюун ухааны дэвшилтэт алгоритмууд нь амьсгал болон хөдөлгөөний улмаас үүсдэг дүрсний алдагдал, артифактыг бууруулж, судасны бүтэц болон эмгэг өөрчлөлтийг илүү тод, өндөр нарийвчлалтайгаар дүрслэх боломжийг бүрдүүлж байна. Ингэснээр оношилгооны чанар сайжирч, өвчнийг эрт үед нь илрүүлэхээс гадна эмчилгээний тактикийг илүү оновчтой төлөвлөх нөхцөл бүрдэж байгаа аж.

Түүнчлэн бага тунгийн цацраг ашиглан өндөр чанарын дүрс гаргах технологи нь өвчтөний аюулгүй байдлыг хангахын зэрэгцээ олон улсын стандартад нийцсэн, түргэн шуурхай, найдвартай оношилгооны үйлчилгээг үзүүлэх боломжийг нэмэгдүүлж байна.