ZAWAN

د امریکا مرکزي قوماندانۍ (سنټکام) اعلان کړی، چې د ایران په سویلي سیمو کې یې داسې توغندیز مرکزونه او بېړۍ په نښه کړې، چې غوښتل یې د هرمز تنګي په شاوخوا کې سمندري ماینونه ځای پر ځای کړي.

سنټکام وایي: دا بریدونه یې د بندر عباس ښار ته نږدې د خپلو ځواکونو له حق څخه «د ځان دفاع» په موخه کړي دي.

ایرانستاني رسنیو په سیمه کې چاودنې تایید کړې دي.

دا بريدونه داسې مهال کېږي، چې په دوحه کې د ایران او امریکا د احتمالي هوکړې لپاره د سولې خبرې روانې دي؛ خو د امریکا د بهرنیو چارو وزیر مارکو روبیو او د ایران بهرنیو چارو وزارت دواړو ټینګار کړی، چې لا هم وروستۍ هوکړې ته رسېدل وخت غواړي او واشنګټن د هرمز تنګي د پرانیستي پاتېدو غوښتونکی دی.

د تېر جمهوري نظام پر مهال د افغانستان د ملي امنیت ادارې مشر رحمت‌الله نبیل ویلي، احتمال شته چې د ایران اسلامي جمهوریت په نږدې راتلونکي کې د طالبانو حکومت په رسمیت وپېژني.

د امریکا جمهوري‌پال سناتور لینډسي ګراهام خبرداری ورکړی، که سعودي عربستان، قطر او پاکستان له ابراهيمي تړون سره له يو ځای کېدو څخه انکار وکړي، «دا به زموږ د راتلونکو اړیکو لپاره جدي پایلې ولري او دغه د سولې وړاندیز به د منلو وړ نه وي»

د نړیوالو تېلو بیې د وروستیو دوو اوونیو تر ټولو ټیټې کچې ته راښکته شوې دي. د «اویل پرایس» وېبپاڼې د راپور له مخې، د خامو تېلو په نړیوال بازار کې د بیو کمېدو بهیر دوام لري.

په داسې حال کې، چې د طالبانو مشر پر ملي کلمه بندیز لګولی، د دې ډلې د اطلاعاتو او کلتور وزارت وایي، د لوحو او اعلاناتي تابلوګانو د اصلاح کمېسیون په ۱۴۰۴ لمریز کال کې د ژبې د پیاوړتیا او د اعلاناتو د تنظیم په موخه ۲۷۵ بهرنیو کلمو ته ملي بدیلونه ټاکلي.

د طالبانو مخالفې مقاومت جبهې ویلي چې د بلخ ولایت په مرکز مزار شریف کې یې د راکټي بریدونو په پایله کې ۵ طالبان وژلي او ۳ نور یې ټپیان کړي دي.

طالبانو تر اوسه ددې ادعا په اړخه څه نه دي ویلي

د خېبر پښتونخوا د کرمې ولسوالۍ په منځنۍ برخه کې د تحریک طالبان پاکستان او د هغې نه بېلې شوې ډلې جمعیت الاحرار ترمنځ په خونړیو خپلمنځي نښتو کې لږ تر لږه ۲۲ تنه وژل شوي دي

د جمهوري نظام پر مهال د افغان فلم رییسې صحرا کریمي ویلي چې په افغانستان کې د ښځو او نجونو پر وړاندې محدودیتونه یوازې ټولنیز بندیزونه نه دي، بلکې د هغې په وینا د «فکري او انساني موضوعاتو د له منځه وړلو یوه سیسټماټیکه پروژه» ده چې د انسان د ذهن، لید او غبرګون ظرفیتونه کمزوري کوي.

د طالبانو د ارشاد، حج او اوقافو وزیر مولوي نورمحمد ثاقب د پنجشنبې په ورځ د افغان حاجیانو د چارو د مستقیم څار او د حج پروسې د رهبرۍ لپاره سعودي عربستان ته سفر کړی دی. د دې وزارت په خبرپاڼه کې ویل شوي چې روان کال شاوخوا ۳۰ زره افغان حاجیان مکې مکرمې ته رسېدلي دي

د امریکا ولسمشر ډونالډ ټرمپ ویلي، ښايي د خپل مشر زوی جونیور ډونالډ ټرمپ د واده په مراسمو کې ګډون ونه کړي، ځکه د هغه په وینا د دغو مراسمو وخت ورته مناسب نه دی او دا مهال د «ایران موضوع او نورو مسایلو» سره بوخت دی.

د خیبر پښتونخوا سر وزیر سهیل اپريدي او د عمران خان خور عليمه خان ادعا کړې ده، چې د اډیاله زندان مخې ته د احتجاجي ناستې پر ګډونوالو ډزې شوې او یوشمېر کسان په‌کې ټپیان شوي دي.