Skip to content
Salons10
Nourish by Kenneth

Nourish by Kenneth

Istanbul

The place for your daily lifestyle tips, mental and physical well being

01/11/2026

ညီမလေးက အချစ်ကို ကိုးကွယ်သတဲ့လား။

ဆရာမ မိုးမိုး(အင်းလျား) ရဲ့ ဒီစာအုပ်ကို ဖတ်နေရင်း စိတ်ထဲက ခဏခဏရွတ်မိတာကတော့ ညီမလေးက အချစ်ကို ဒီလောက်တောင် ကိုးကွယ်ရလား..ဆိုတာပဲ။

ခဏခဏလည်း ဇာတ်လမ်းထဲဝင်ပြီး စုကို ခေါင်းပြေးခေါက်ချင်တာ။

ဖတ်နေရင်းက ကိုယ့်ရဲ့ ညီမငယ်လေး တစ်ယောက်လို မြင်လာစေတဲ့ သိပ်ကို စိတ်ကူးယဉ်တတ်တဲ့ စု ဟာ တကယ်ကို ထွေးပိုက်ချင်စရာ နှစ်သိမ့်ပေးချင်စေရာကောင်းပေမဲ့ တဖက်ကကြည့်ရင်လည်း ခေါင်းသိပ်မာတဲ့ မိန်းကလေးတစ်ယောက်ပဲ။

ဒီဝတ္ထုထဲမှာ အသဲအယားဆုံးကတော့ တလွဲဆံပင်ကောင်းတာနဲ့ တလွဲမာနတွေပဲ။
စုဟာ သူ့ရဲ့ချစ်ခြင်းကို မတွေးပေးကြဘူးဆိုပြီး မိသားစုဝင်တွေအပေါ် နားလည်မှုလွဲတယ်။ သူ့ရင်ထဲကို ဝင်မကြည့်ပေးဘူးဆိုပြီး မိသားစုဝင်တွေဘက်ကိုတော့ တစ်ခါလေးမှတောင် ဖြည့်မတွေးခဲ့ဖူးဘူး။ အဆုံးထိ သူလုပ်ချင်ရာကို လုပ်သွားခဲ့တာပဲ။
စုရဲ့ ယောကျာ်း နေမင်းကတော့ ဒီနေရာမှာ ပိုဆိုးတယ်၊ မရှိတဲ့သူတစ်ယောက်ရဲ့ မာနက တလွဲမာနတွေဖြစ်နေတော့ ကြည့်ရပိုဆိုးတယ်။
နေမင်းသာ သူ စကားအထအနကောက်တတ်သလောက် အလုပ်ကိုလုပ်တတ်ခဲ့မယ်ဆိုရင် ဒီလိုအဖြစ်မျိုးတွေလည်း ဖြစ်ခဲ့မှာမဟုတ်ဘူး။

ဆရာမ က ဒီ ဝတ္ထုထဲမှာ ယူရမယ့် သင်ခန်းစာတွေကို ပေါ်ပေါ်ထင်ထင် ထည့်ပြ၊ ပြောပြထားတယ်။ ဒီထဲမှာ ကိုယ် သဘောကျတဲ့ နှစ်ချက်ကိုပဲ ထုတ်ပြချင်ပါတယ်။

1️⃣ စာဖတ်ခြင်းဟာ အုပ်ထိန်းသူလိုတယ်။

အတော်များများက ကလေးငယ်တစ်ယောက် စာဖတ်ဝါသနာပါတယ်၊ စာအုပ်ကိုင်နေတယ်ဆိုရင် သိပ်ကို ကျေနပ်တတ်ကြတယ်။ ဒါပေမဲ့ ဒီကလေးငယ် ဘယ်လိုစာအုပ်၊ စာပေအမျိုးအစားကို ထိတွေ့နေသလဲဆိုတာ ကြည့်ရှု စစ်ဆေးဖို့ မေ့လျော့နေတတ်တယ်။
လူတစ်ယောက်ဟာ အမှားအမှန် ဝေဖန်ပိုင်းခြားနိုင်ဖို့အတွက် စာပေအမျိုးအစားအားလုံးကို လိုက်လံဖတ်ရှုသင့်ပေမဲ့ အရွယ်မရောက်သေးခင်၊ အချိန်မတန်ခင် မဖတ်သင့်တဲ့ စာပေမျိုးဖတ်မိတဲ့အခါ နုနယ်သေးတဲ့အရွယ်ပေါ် သက်ရောက်လွှမ်းမိုးမှုများသွားပြီး လမ်းလွဲကို ရောက်ဖို့ဖြစ်သွားတတ်ပါတယ်။ (ဒါကို စာပေအဆိပ်သင့်တယ်လို့လည်း သုံးကြမယ်ထင်တယ်)

ဝတ္ထုထဲမှာ စုဟာ နဂိုကတည်းကမှ ကဗျာတွေချစ်တဲ့ နူးညံ့စိတ်ကူးယဉ်တတ်တဲ့ မိန်းကလေးဖြစ်ခဲ့ပြီး ငယ်
စဉ်မှာပဲ စိတ်ကူးယဉ်အချစ်ဇာတ်လမ်းတွေကို ဖတ်မိနေခဲ့တယ်၊ ဒါကို အုပ်ထိန်းသူတွေကလည်း မကြည့်ရှုမိဘဲ စာဖတ်တာကောင်းတယ်ဆိုတဲ့နေရာမှာတင် ရပ်နေမိခဲ့ကြတယ်။
ဒါကပဲ စုရဲ့ဘဝကို ဟိုးအောက်ဆုံးထိ ဆွဲချသွားဖို့ အစဖြစ်လာခဲ့တယ်။

2️⃣ “I can fix him” syndrome

ဒါကတော့ ခုခေတ် လူငယ်လေးတွေကြားထဲမှာကို အငြင်းအခုံဖြစ်ကြတဲ့ အကြောင်းအရာဖြစ်တယ်။ (ဒီနေရာမှာ Syndrome ဆိုတာ စိတ်ရောဂါနာမည်ကို ပြောချင်တာမဟုတ်ဘဲ Relationship အကြောင်းကို ဆွေးနွေးတဲ့အခါသုံးတဲ့ စာလုံးသာဖြစ်ပါတယ်)

အထူးသဖြင့် မိန်းကလေးတွေဟာ ကိုယ့်ချစ်သူကောင်လေးရဲ့ အရင်ကတည်းကပါလာတဲ့ ဗီဇကို ကိုယ့်ရဲ့ ချစ်ခြင်းမေတ္တာ၊ စိတ်ရှည်သည်းခံမှုတွေနဲ့ အလုံးစုံပြောင်းလဲနိုင်မယ်လို့ယုံကြည်ကြတယ်။ ဒါဟာ မိန်းကလေးတွေမှာပေါ်လာတတ်တဲ့ Love pattern တစ်ခုဖြစ်ပြီး ဒီအခိုက်အတန့်မှာ တစ်စုံတစ်ယောက်ရဲ့ ဘဝမှာ ကိုယ်ကသာ မချစ်ပေး၊ ဝင်မပြောင်းလဲပေးရင် မရတော့ဘူးလို့ ထင်မြင်မိလာတတ်ပါတယ်။
ဥပမာ သူက အရက်အရမ်းသောက်တတ်ပေမဲ့ ကိုယ်နဲ့တွဲတဲ့အခါ သောက်တော့မှာမဟုတ်ဘူး၊ သူက ကိုယ်ထိလက်ရောက်ကျူးလွန်တတ်ပေမဲ့ ကိုယ်နဲ့တွေ့ရင် အေးဆေးတည်ငြိမ်သွားတယ် စတဲ့ မျှော်လင့်ချက်ပုံစံမျိုးတွေပါ။
ပိုဆိုးတာက ကိုယ်ဟာ သူလက်ရှိ ဘယ်လိုလူဖြစ်နေသလဲဆိုတာထက် အနာဂတ်မှာ ဘယ်လိုလူကောင်းတစ်ယောက် ဖြစ်လာနိုင်သလဲဆိုတဲ့ Potential ကို ပိုချစ်မိသွားတဲ့အခါ ဒီ relationship မှာ ပိုပြီး နစ်မြုပ်သွားတတ်ပါတယ်။ သူပြောင်းလဲလာမယ့်အချိန်ကို အမြဲစောင့်မျှော်နေတာကြောင့် လက်ရှိအပြုအမူဆိုးတွေကိုလည်း အကြောင်းပြချက်ရှာပေးတတ်ပြီး ဘေးက စိတ်ပူလို့ပြောတဲ့စကားတွေကိုတောင် ဘေးစကားတွေလို့ အမှတ်ထင်မှားတတ်ပါတယ်။

ဒီနေရာမှာ သေချာခွဲခြား သိထားဖို့လိုတာက လူတစ်ယောက်ကို ချစ်ခြင်းက ပြောင်းလဲစေနိုင်တဲ့ အထောက်အပံ့တစ်ခု ဖြစ်နိုင်ပေမဲ့ သူ့ရဲ့အတွင်းစိတ်၊ အကျင့်စရိုက်နဲ့ အပြုအမူတွေကို ပြောင်းလဲဖို့အတွက်တော့ သူကိုယ်တိုင် ပြောင်းလဲချင်တဲ့ဆန္ဒရှိဖို့ လိုအပ်တယ်ဆိုတာပါပဲ။

ဒီလို relationship မှာ အချို့တွေ ပြောင်းလဲသွားနိုင်ခဲ့ပေမဲ့ စုကတော့ သူ့ဘဝနစ်မွန်းသွားခဲ့တာသာ အဖတ်တင်ခဲ့ပါတယ်။

ဝတ္ထုတောက်လျှောက်မှာ စု ကို စိတ်တွေဆိုးခဲ့ပေမဲ့ အဆုံးမှာတော့ သူ့ကို ကြင်နာ သနားရတာပါပဲ။
ဖြစ်နိုင်ရင် သူ့ကို သားသားမီးမီးတွေ ထိန်းကျောင်းရင်း အောင်မြင်အေးချမ်းတဲ့ စာရေးဆရာမ၊ အိမ်ထောင်ရှင်မအဖြစ် မြင်ခဲ့ချင်တာပါ။

တကယ်ကိုပဲ ညီမလေးက အချစ်ကို သိပ်ကို ကိုးကွယ်ခဲ့တာပါပဲ..။

#မိုးမိုးအင်းလျား #ညီမလေးကအချစ်ကိုကိုးကွယ်သတဲ့လား

30/10/2026

ချစ်သူလား… စကားတစ်ပွင့် ပွင့်ခဲ့တယ်

(Edit - ယခုစာသည် ကျွန်တော့်တစ်ဦးတည်း၏ ဝတ္ထုအပေါ်မှာ ထပ်မံတွေးတောမိသော အတွေးများသာဖြစ်ပါသည်၊ ဇာတ်ကောင်အပေါ်၊ ဝတ္ထုအပေါ် တစ်စုံတရာ ဖျက်ဆီးလိုစိတ်မရှိပါ)

ဆရာမဂျူးရဲ့ စာအုပ်တွေထဲမှာ စာဖတ်တဲ့သူကို မေးခွန်းတွေ အများဆုံးနဲ့ အဖွင့်ပုံစံ တွေးချင်သလိုတွေးလို့ရတဲ့ စာအုပ်ကိုပြပါဆိုရင် “ချစ်သူလား… စကားတစ်ပွင့် ပွင့်ခဲ့တယ်” ဖြစ်မယ်ထင်တယ်။

ဒီ ဝတ္ထုကိုသာ ပြဌာန်းစာအုပ်ထဲထည့်သင်မယ်ဆိုရင် မေးစရာမေးခွန်းတွေ၊ ဆွေးနွေးငြင်းခုံစရာတွေက တကယ်ကို အပုံအပင်ပဲ။

ဒီထဲမှာမှ ကိုယ်ဆွဲအထုတ်ချင်ဆုံး မေးခွန်းကတော့ ခွန်သာ နဲ့ ပတ်သက်တာတွေပဲ။

0️⃣ ခွန်သာက ဘယ်လိုဖြစ်တည်မှုမျိုးလဲ။

ခွန်သာက လူလား၊ ဝိညာဉ်လားဆိုတဲ့ ငြင်းခုံမှုမှာ ဝိညာဉ်ဆိုတဲ့ ဘက်ကတော့ ပိုအလေးသာကြမယ်
ထင်တယ်။ ဒါပေမဲ့ ဝိညာဉ်လို့ပါဆိုပြီးလည်း တစ်ထစ်ချ ပြောခွင့်မပေးထားပြန်ဘူး။
ကြည့်ရသလောက် ခွန်သာ့ကို ဆရာမ ကိုယ်တိုင်က သူကတော့ ဘာပါဆိုပြီး ဖွင့်မချပြချင်ဘူးထင်တယ်။
ဒါကြောင့်ပဲ ခွန်သာက ဘယ်လိုပါဆိုပြီး ထောက်ပြလို့ရတဲ့ အချက်အလက်တွေအကုန် ဝတ္ထုထဲမှာတင် ပယ်ဖျက်ချပစ်ခဲ့တာ။
နောက်ဆုံး မြှုပ်ထားတဲ့ ရုပ်အ.လောင်းရဲ့ လက်ကောက်ဝတ်ကိုပါ ဖျောက်ဖျက်ပစ်တဲ့အထိပဲ။

(အင်တာဗျူးမှာတော့ ဆရာမက ခွန်သာ့ကို သက်ရှိလူလို့ ယူဆလို့ရနိုင်ကြောင်း ဖြေထားတယ်လို့ ပြောပါတယ်)

ဒါပေမဲ့ ဒီလို ဇဝေဇဝါဖြစ်စေမှုကပဲ ခွန်သာ့ရဲ့ ဖြစ်
တည်မှုကို ပိုပြီး လေးနက်သွားစေခဲ့တယ်။
ကျွန်တော့်အတွက်တော့ ဆရာမဖန်တီးခဲ့သမျှ ဇာတ်ကောင်တွေထဲမှာ ခွန်သာက အသိမ်မွေ့နူးညံ့ဆုံး အထီးကျန်ဆုံးသော ဖြစ်တည်မှုလို့ ထင်တယ်။

1️⃣ ခွန်သာဟာ မေဇော့်ကြောင့် ဖြစ်ပေါ်လာရသလား။

ခွန်သာက လူလား၊ ဝိညာဉ်လားဆိုတဲ့ မေးခွန်းကို ကျော်လွန်ပြီး နောက်ထပ်တွေးမိတဲ့အချက်ကတော့ ခွန်သာဟာ အကုန်လုံးထင်နေကြသလို သက်ရှိလူရော၊ ဝိညာဉ်ရောမဟုတ်ဘဲ မေဇော်နု စိတ်က ဖန်တီးထားတဲ့ Imaginary Friend များဖြစ်နေမလားဆိုတာပဲ။
ဒီထက်ပိုလေးနက်ရရင်တော့ Hallucination (စိတ်ထင်ယောင်ထင်မှားဖြစ်ခြင်း) ပေါ့။
လူတစ်ယောက်ဟာ အထီးကျန်မှုနဲ့ အချိန်အကြာကြီး ထိတွေ့လာရတဲ့အခါ ဦးနှောက်ရဲ့ အာရုံခံစားမှုနဲ့ အချက်အလက်အဓိပ္ပာယ်ဖော်မှုစနစ်တွေမှာ အပြောင်းအလဲဖြစ်လာပြီး ပြင်ပမှာ အမှန်တကယ်မရှိတဲ့ အရာတွေကိုတောင် ရှိနေသလို ခံစားလာရနိုင်ပါတယ်။
ဘာလို့ ဒီလို တွေးမိလဲဆိုတော့ မေဇော်နုဟာ မင်းညိုစင်ဆိုတဲ့ ယောကျာ်းတစ်ယောက်ဆီက အချစ်ကို အချိန်အကြာကြီး မျှော်လင့်တောင့်တနေခဲ့ပေမဲ့ မင်းညိုစင်ဘက်က အရောင်ပါတဲ့ ခံစားမှုလေး တစ်စွန်းတစတောင် မမြင်ခဲ့ရပါဘူး။
ပြီးတော့ မေဇော်နုဟာ အခြားသူငယ်ချင်းတွေနဲ့ အရောတဝင်နေတာမျိုးလည်း မရှိဘဲ စာအုပ်တွေကြားမှာသာ လုံးပန်နေခဲ့တာပါ။
မေဇော်က သူ့ကိုယ်သူလည်း မသေချာမရေရာမှုတွေနဲ့ စိတ်မလုံခြုံမှုတွေကို အမြဲခံစားနေခဲ့ရတဲ့သူပါ။

ဒီလိုနဲ့ မြဦးမေ ဆိုတဲ့ စာရေးဆရာမရဲ့ အတ္ထုပတ္တိကို ပြုစုဖို့ ဖြစ်လာတဲ့အခါ ခွန်သာ က မေဇော့်ရဲ့ စ်တ်ထဲရောက်လာဖို့ အလေးသာလာနိုင်ပါတယ်။
ခွန်သာ့ကိုတွေ့တဲ့နေရာကလည်း လူတစ်ယောက်ရဲ့ အကြား၊ အမြင်၊ အနံ့၊ အထိအတွေ့ အရာအားလုံးကို အဆုံးစွန်ထိ ခံစားနိုင်တဲ့ စကားပန်းတွေ ရှိတဲ့နေရာမှာပါ။
ဒါကြောင့်ပဲ ခွန်သာဟာ မေဇော်နုရဲ့ အထီးကျန်မှု၊ ချစ်ခြင်းမေတ္တာငတ်မွတ်မှု၊ စိတ်မလုံခြုံမှုတွေကို ဖြည့်ဆည်းပေးဖို့ဖြစ်လာတဲ့ မေဇော်နုကိုယ်တိုင် ဖန်တီးမိလိုက်တဲ့ စိတ်ကူးယဉ်ဖြစ်တည်မှုများလားဆိုပြီး တွေးမိလာတာပါ။

2️⃣ မတော်တဆလား၊ ကိုယ့်ကိုယ်ကို အဆုံး.စီ.ရင်မှုလား။

ဒီထဲမှာ နောက်ထပ် စိတ်ဝင်စားမိတဲ့ မေးခွန်းကတော့ ဇာတ်ကောင်တွေရဲ့ သေဆုံးမှုပါ။ ဝတ္ထုထဲမှာ အရေးကြီးတဲ့ ဇာတ်ကောင် ၃ ယောက်ထိ သေဆုံးခဲ့တယ်။ ဒါပေမဲ့ သူတို့သေဆုံးမှုဟာလည်း ဝိရောဓိတွေနဲ့ပဲဖြစ်တယ်။
ကိုသီဟက မြဦးမေဟာ ခွန်သာ့ကြောင့် သေရတယ် ပြောတယ်။ ခွန်သာကတော့ မြဦးမေဟာ သူကိုယ်တိုင်ပဲ ရေထဲဆင်းသွားတယ် ပြောတယ်။
ဇာတ်သွားအရတော့ မြဦးမေဟာ ကိုယ့်ကိုယ်ကို အဆုံးစီရင်ဖို့ အကြောင်းထွေထွေထူးထူး မရှိဘူးလို့ ထင်တယ်။ ကိုယ့်အနေနဲ့တော့ မြဦးမေဟာ မတော်တဆဖြစ်ပြီးတော့ပဲ သေဆုံးခဲ့တယ်လို့ထင်တယ်။ ဒါဆို ခွန်သာက လုပ်ကြံလီဆယ်ပြောသလားဆိုရင် အပေါ်က ကျွန်တော်ပြောခဲ့တဲ့ ခွန်သာဟာ မေဇော်နုရဲ့ စိတ်ကူးယဉ်ဇာတ်ကောင်လားဆိုတဲ့အတွေးနဲ့ပြန်ချိတ်မိတဲ့အခါ မြဦးမေဟာ ကိုယ့်ကိုယ်ကို အဆုံးစီရင်သွားတယ်ဆိုတဲ့ ဖြစ်ရပ်ဟာ မေဇော်နုရဲ့ အတ္ထုပတ္တိထဲထည့်ချင်တဲ့ စိတ်ဆန္ဒသက်သက်များလားလို့လည်း တွေးမိတယ်။

ခွန်သာနဲ့ ဥယျာဉ်မှူးကတော့ သူတို့ကိုယ်တိုင်ပဲ သေဆုံးဖို့ ရွေးချယ်ခဲ့တယ်လို့ မြင်မိတယ်။

3️⃣ မင်းညိုစင်ဟာ မေဇော့်ကို ချစ်သလား။

ဒီဝတ္ထုထဲမှာ မေဇော်နဲ့အတူ အစကနေအဆုံးထိ လိုက်ပြီး ရှာဖွေခဲ့တာကတော့ မင်းညိုစင် မေဇော့်ကို ချစ်မချစ် ဆိုတာပါပဲ။
မေဇော်လိုအပ်တာမှန်သမျှ မင်းညိုစင် အကုန်ဖြည့်ဆည်းခဲ့ပေမဲ့ အဲ့ဒီထဲမှာ အချစ်ဆိုတာ မပါခဲ့ဘူး။
ပြီးတော့ ဒေါ်အေးအေးထွန်း..
အစကတော့ ဒေါ်အေးအေးထွန်းကို အလုပ်က စီနီယာအမကြီးလောက်မြင်ခဲ့ပေမဲ့ ကိုသီဟရဲ့ လွယ်အိတ်
တောင် ပစ်ချခင်းပေးတယ်ဆိုတဲ့ဟာ ဖတ်အပြီးမှာ ဒေါ်အေးအေးထွန်းရဲ့ လေးနက်မှုက ပိုပေါ်လာတယ်။
အများပြောနေကျ မိန်းမတွေရဲ့ ဆဌမအာရုံကို အထင်မသေးနဲ့ဆိုတာလေ.. မေဇော်နု တွေးနေခဲ့သလို မင်းညိုစင်ကကော ဒေါ်အေးအေးထွန်းအပေါ်မှာ စိတ်ရှိနေခဲ့တာများလား။ မေဇော့်ကို ဒေါ်အေးအေးထွန်းလို ဖြစ်စေချင်တယ်လို့ ပြောတဲ့ မင်းညိုစင်ရဲ့ စိတ်ထဲမှာ တကယ်ပဲ ဘယ်သူများရှိနိုင်မလဲ မသိဘူး။
ဝတ္ထုကို ကိုယ့်စိတ်ကူးနဲ့ဆက်သွားရမယ်ဆိုရင် မင်းညိုဟာ မေဇော့်ကို လက်ထပ်ဖြစ်ကောင်း လက်ထပ်ပါလိမ့်မယ်၊ ဒါပေမဲ့ မေဇော်မျှော်လင့်ထားတဲ့ ချစ်ခြင်းကို ထုတ်ပြတာမျိုးတော့ ရှိလာမှာမဟုတ်ပါဘူး။ ဒါဟာ သူ့ပုံစံကြောင့်လား၊ သူတကယ်ချစ်တဲ့သူက တခြားတယောက်ဖြစ်နေတာကြောင့်လားဆိုတာတော့ မင်းညိုစင် ကိုယ်တိုင်ပဲ သိပါလိမ့်မယ်။

4️⃣ ခွန်သာဟာ တကယ်များ ဝိညာဉ်ဖြစ်နေခဲ့တယ်ဆိုရင်..

ဒီမေးခွန်းကတော့ ကိုယ့်အတွက် အလေးလံဆုံးပဲ။
ခွန်သာဟာ တကယ်ပဲ ဝိညာဉ်သာဆိုရင် သူဟာ အပြစ်တွေကို ထွေးပိုက်ထားရတဲ့ စကားပင်တွေကြားမှာ တဝဲလည်လည်ဖြစ်နေတဲ့ အထီးကျန်ဝိညာဉ်ဖြစ်နေမှာအသေအချာပဲ။
မေဇော် မရောက်လာခင်အထိ သူဟာ အမှောင်ထဲမှာနေရင်း အမေကို၊ သေစေတဲ့ သားအဖြစ် ယူကျုံးမရမှုတွေနဲ့ ရှိနေခဲ့ရာကနေ မေဇော်က သူ့အတွက် ထွေးပွေ့မှု၊ အလင်းရောင် ဖြစ်ခဲ့တယ်။
အမေဖြစ်သူလိုပဲ စကားပန်းတွေကိုချစ်တဲ့ မေဇော်ဟာ သူ့မျက်လုံးထဲမှာ အရမ်းကို လှနေခဲ့လိမ့်မယ်။
ပြီးတော့ သူခေါ်ရာနောက် ရဲရဲကြီးလိုက်ရဲတဲ့ မိန်းကလေးဟာလည်း သူ့ဘဝမှာ “မေ” လို့ သူ တယုတယခေါ်ရတဲ့ မေဇော်တယောက်သာရှိခဲ့လိမ့်မယ်။
ခွန်သာဟာ မေဇော့်ကို ဘယ်လောက်တောင် တွယ်တာသလဲဆိုရင် အဆုံးထိ နှုတ်ဆက်စကားတောင် အပြောမခံခဲ့ဘူး။
ကိုယ့်အမြင်အရဆိုရင် ခွန်သာဟာ ဒေါ်တင်တို့ထင်ထားသလို ကျွတ်လွတ်သွားမှာမဟုတ်ဘဲ ပိုပြီး အစွဲအလန်းကြီးတဲ့ အထီးကျန်မှုတွေကြားမှာ မျှော်လင့်ချက်ယဲ့ယဲ့ကလေးနဲ့ မေဇော်ပြန်အလာကို မျှော်နေမယ့် ဝိညာဉ်အဖြစ် ဆက်ရှိနေသွားမယ်လို့ ထင်တယ်။

သူ့အမေကလည်း သူ့အဖေဆီ တစ်ချိန်တော့ ပြန်လာခဲ့တာပဲမလား..။

ဘယ်လိုပဲဖြစ်ဖြစ် “ချစ်သူလား.. စကားတစ်ပွင့်ပွင့်ခဲ့တယ်” ဟာ ကိုယ့်ကို စကားပန်းတွေအကြောင်း၊ ချစ်ခြင်းမေတ္တာနဲ့ မျှော်လင့်ချက်အကြောင်း အများကြီးပြောပြခဲ့တဲ့ ဝတ္ထုတစ်ပုဒ်ပါပဲ။

#ဂျူး #ချစ်သူလားစကားတစ်ပွင့်ပွင့်ခဲ့တယ်

28/10/2026

မောင်ဟာ တကယ်ပဲ စုစုထွေးကို ချစ်ခဲ့သလား။

ဆရာမ ဂျူး ရဲ့ အမှတ်တရကိုတော့ အတော်များများ တစ်ခါတောင်မကဘဲ ဖတ်ဖူးကြမှာပါ။
ကျွန်တော်ကိုယ်တိုင်လည်း စိတ်လိုလက်ရရှိတိုင်း ပြန်
ပြန်ဖတ်လေ့ရှိတဲ့ ဝတ္ထုတွေထဲမှာ အမှတ်တရက အမြဲ ပါတတ်ပါတယ်။
ခုလည်း ဒီဘက်မှာ မိုးလေးအုံ့နေတော့ မောင်နဲ့စုစုထွေးက စိတ်ထဲရောက်လာတာမို့ ချက်ချင်းပဲ ပြန်ဖတ်ဖြစ်ခဲ့ပါတယ်။
ရှေ့အခေါက်တွေဖတ်တုန်းက စုစုထွေးနေရာကနေ လိုက်တွေး၊ လိုက်ခံစားပြီး ဖတ်ခဲ့တာပေမဲ့ ဒီတစ်ခါမှာ နာမည်တောင် မသိရတဲ့ မောင့်ရဲ့ character ကို စိတ်ဝင်စားတာရော၊ အမြဲတမ်း စုစုထွေးရဲ့ အတွေးနေရာကနေပဲ လိုက်တွေးနေမိခဲ့တာရောကြောင့် ဒီတစ်ခေါက်တော့ မောင့်ရဲ့ နေရာကနေ ဝင်ရောက်ပြီး အမှတ်တရကို ပြန်ဖတ်ဖို့ ဆုံးဖြတ်လိုက်တယ်။
(ဒါတောင် ကိုယ်အရမ်းကြိုက်ရတဲ့ဝတ္ထုမို့ စုစုထွေးနေရာကရောက်ရောက်သွားသေးတာ)

ဇာတ်ကောင်နေရာကို ပြောင်းပြီး ဖတ်ကြည့်မိမှ မောင့်ရဲ့ ပုံစံကို ပိုတွေးမိပြီး စုစုထွေးဟာလည်း သိပ်ပြီး အချိုးပြေလှတဲ့ မိန်းကလေး မဟုတ်ဘူးဆိုတာ တွေ့လာရတယ်။
(ဒီစာဟာ စုစုထွေးရဲ့ အတွေး၊ character တွေထက် မောင့်ရဲ့ ပုံစံနဲ့ စုစုထွေးပေါ် သဘောထားဘယ်လိုရှိလဲဆိုတာကို ကိုယ်မြင်သလို ရေးသားထားတဲ့ စာဖြစ်ပါတယ်)

0️⃣မောင်ဟာ ဘယ်လို စိတ်ထားရှိတဲ့သူဖြစ်သလဲ။

ဇာတ်ကောင်အရ - မောင်ဟာ အရပ်ရှည်သွယ်ပြီး
ပုံမှန်ယောကျ်ားလေး အများစုမှာရှိတဲ့ စရိုက်တွေ ရှိတဲ့သူ၊ ပစ်စလတ်ခတ်နေတတ်သူ၊ ပေါင်မုန့်နဲ့ထောပတ်သုတ်ကို အလွန်ကြိုက်တဲ့သူ၊ ဖဲရိုက်ရတာ၊ စီးကရက်ဖွာရှိုက်ရတာ ကြိုက်တဲ့သူ၊ ပန်းပင်စိုက်ရတာ၊ စျေးဝယ်ထွက်ရတာ ဝါသနာမပါတဲ့သူ၊ စိတ်ရှုပ်မခံတတ်သူ တစ်ယောက်ဖြစ်တယ်။
တောင်ပေါ်မြို့လေးတစ်မြို့ကလာတဲ့ ဆေးကျောင်းသားမို့ မိသားစုရဲ့ အလိုလိုက်ခြင်းကိုလည်း ခံရမှာဖြစ်ပြီး တစွတ်ထိုးလုပ်တတ်တဲ့ အနိုင်ယူတတ်တဲ့ ချစ်ခင်ယုံကြည်ရသူတွေနဲ့ဆို ဆိုးနွဲ့တတ်တဲ့ ကောင်ကလေးလည်း ဖြစ်တယ်။

ခေတ်ကာလအရ မောင်ဟာ ဘိုဆန်တတ်တဲ့အကျင့်ကလေးတွေ တွေ့ရပေမဲ့ အတွေးအခေါ်အများစုကတော့ မြန်မာဆန်ဆန်ပဲဖြစ်တယ်။
မောင်ဟာ သူ့ရဲ့ချစ်သူကောင်မလေးဖြစ်တဲ့ စုစုထွေးကို အခြားယောကျ်ားလေးတွေနဲ့ အရောတဝင်မနေစေချင်ဘူး၊ ယောကျာ်းလေးတွေနဲ့ တန်းတူရင်ဘောင်မတန်းစေချင်ဘူး၊ နူးညံ့သိမ်မွေ့တဲ့၊ အလှအပကြိုက်တဲ့၊ အိမ်ထောင်မှုနိုင်နင်းတဲ့ မိန်းကလေးဖြစ်စေချင်တယ်။
ဒါဟာ ခုခေတ်အနေနဲ့ကြည့်ရင် ဖိုဝါဒကြီးစိုးတဲ့ အတ္တကြီးတဲ့ယောကျာ်းပုံစံမျိုးဖြစ်ပေမဲ့ မောင့်နေရာက သေချာခံစားကြည့်မယ်ဆိုရင် မောင့်လုပ်ရပ်တွေက စုစုထွေးကို တဆင့်ချိုးနှိမ်ချင်တာမျိုးမဟုတ်ဘဲ ချစ်သူကောင်လေးတစ်ယောက်ဆီက ထွက်ပေါ်လာတဲ့ စိုးရိမ်ပူပန်မှုနဲ့ ချစ်မြတ်နိုးမှုတွေကြောင့်လို့ ထင်ရပါတယ်။

1️⃣ မောင်ဟာ စုစုထွေးကို တကယ်ချစ်ခဲ့သလား။

မောင်က စုစုထွေးကို ချစ်မချစ် မစဉ်းစားခင် မောင့်ရဲ့ အကြိုက် ideal type ကို အရင်ကြည့်ကြည့်ဖို့ လိုပါမယ်။
မောင့်ရဲ့ ideal type ဟာ အထက်တန်းကျောင်းကတည်းက အသည်းအသန်လိုက်ခဲ့ရတဲ့ ဖြူသွယ်ပြီး နုထွေးတဲ့ နန်း ဆိုတဲ့ မိန်းကလေးပုံစံမျိုးပါ။

အဲ့သည်လို အလှအပကြိုက်တတ်တဲ့ မောင်ဟာ လူ၊သေကောင်တွေကို မျက်မှောင်ကျုံ့ပြီး ကြည့်နေတဲ့ အရပ်ခပ်နိမ့်နိမ့်၊ အသားလတ်လတ်၊ မိန်းကလေးလည်း မဆန်၊ ယဉ်သွယ်တဲ့ အလှမျိုးလည်းမရှိတဲ့ စုစုထွေးဆိုတဲ့ ကောင်မလေးကို ကြိုက်နှစ်သက်သွားခဲ့တယ်။
ခုခေတ်အနေနဲ့ဆို ဒီတိုင်း အပျော် play တာမျိုးလားလို့ တွေးမိနိုင်ပါတယ်။
ဒါပေမဲ့ ရည်းစားရှုပ်ပွေခြင်းမရှိတဲ့အပြင် ချစ်မြတ်နိုးကြောင်းကို အချိိန်ကာလတစ်ခုရောက်မှ စာတစ်စောင်နှင့် ဖွင့်ဟဝန်ခံခဲ့တာမို့ မောင်ဟာ စကတည်းက စုစုထွေးအပေါ် စိတ်ကစားရုံသက်သက် မဟုတ်ခဲ့တာတော့ သေချာမြင်ခဲ့ရပါတယ်။
ပြီးတော့ မောင်က အပေါ်မှာပြောခဲ့သလို ချစ်မြတ်နိုးရသူတွေအပေါ်ဆို ဆိုးနွဲ့တတ်တဲ့အကျင့်ရှိပြီး စိတ်ကောက်တာ၊ စနောက်တာ၊ စကားလေးနဲ့တောင် အထိမခံတာတွေက စုစုထွေးအပေါ် ချစ်တာအပြင် စိတ်နေစိတ်ထားအရ မှီခိုမှုရှိတယ်ဆိုတာပါ မြင်ရပါတယ်။

တကယ်ချစ်တာကိုတော့ နောက်ဆုံး မောင်ပြောတဲ့
“မငိုနဲ့.. မငိုစမ်းပါနဲ့ အချစ်ရယ်။ ငါဘာလုပ်ရမလဲ။ သူနဲ့ကွာပြီး နင့်ကိုယူရမလား။ “
ဆိုတဲ့ စကားက သေချာခံစားရတယ်လို့မြင်တယ်။
အရာအားလုံး လွန်သွားပြီးမှ သွေးရူးသွေးတန်းနဲ့ ပါးစပ်ထဲရှိရာကို ပြောတယ်လို့ ထင်နိုင်ပေမဲ့ ဒီလိုမျိုးစကားကိုပဲ ၂ကြိမ်တောင်ပြောခဲ့တာတွေ့ရတယ်။
ပြီးတော့ စုစုထွေးဟာ မောင့်ရှေ့မှာ တကြိမ်တခါလေးတောင်မှ အားနွဲ့တာ၊ မျက်ရည်ကျတာ မရှိခဲ့ဘူး။ နောက်ဆုံးပြန်တွေ့လို့ မျက်ရည်ကျတာမြင်တော့ ခြေလက်မကိုင်မိဖြစ်ပြီး သူ့ရဲ့ အဆုံးစွန်သောဆန္ဒကို မောင်ဟာ ဖွင့်ဟပြခဲ့ပါတယ်။

2️⃣ ဒါဖြင့် ဘာလို့ ဖောက်ပြန်ခဲ့သလဲ။

စုစုထွေးနေရာကနေ ဖတ်ရင် မောင်ဟာ ချစ်သူရည်းစားရှိနေလျက်နဲ့ လှေနံနှစ်ဖက်နင်းသူ၊ ဖောက်လွဲဖောက်ပြန်ပြုတတ်သူလို့ အပြည့်အဝ ထင်မြင်ရပါတယ်။
ဒါပေမဲ့ ဖတ်ကြည့်ရသလောက် မောင့်ရဲ့ အပြုအမူအားလုံးနီးပါးက စုစုထွေးရဲ့ ပြောသူနေရာကမြင်တဲ့ အတွေးအမြင်သက်သက်တွေပဲဖြစ်တယ်။
တကယ်ဆို စုစုထွေးအနေနဲ့ အဏ္ဏဝါ အအေးဆိုင်မှာကတည်းက ဒါမှမဟုတ် သတင်းတွေ စကြားကတည်းက ကိုယ်တိုင် ထုတ်ပြောအတည်ပြုဖို့ကောင်းတယ်။
မောင့်ရဲ့နေရာက ဝင်ကြည့်မယ်ဆိုရင် စုစုထွေးဟာ သူ့အတွက် ရဲဘော်ရဲဘက်လိုမျိုး ဘဝကို အတူချီတက်လို့ရတဲ့ ပါတနာမျိုးဖြစ်တယ်၊ တဖက်မှာကျ အပေါ်က ပြောခဲ့တဲ့ မောင့်ရဲ့ မြန်မာဆန်ပြီး လွှမ်းမိုးလိုတဲ့ ဆန္ဒကလည်း စကတည်းက ရှိနေပြီး ဒီစိတ်ဆန္ဒဟာ စုစုထွေးအပေါ်မှာ အလုပ်မဖြစ်တာ (အလုပ်မဖြစ်မှာ)၊ သူထားရာနေစေရာသွားမယ့် မိန်းမမျိုးမဟုတ်တာကို ကြိုတင်တွက်ချက်နေခဲ့မှာဖြစ်တယ်။
ဥာဏ်ကောင်းကြတဲ့ နှစ်ယောက်လုံးမှာ မိန်းကလေးဖြစ်တဲ့ စုစုထွေးက အချစ်တစ်ခုတည်းနဲ့ အရာအားလုံးကို လိုက်လျောဖြေလျှော့နိုင်ဖို့ရှိခဲ့ပေမဲ့ မောင်ကတော့ အခြားအရာတွေကိုပါ တွက်ချက်ခဲ့ပုံပေါ်တယ်။

ပြီးတော့ အဏ္ဏဝါအအေးဆိုင်ကိစ္စမှာ စုစုထွေးရဲ့ မာနနဲ့ ဟန်ဆောင်ကောင်းမှုက အရင်ကတည်းက မျက်နှာရိပ်မျက်နှာကဲတောင် သေချာမဖမ်းတတ်တဲ့ မောင့်ကို သူတို့ရဲ့ ဆက်ဆံရေးက ဒီလောက်တော့လည်း မလေးနက်ပါဘူးလို့ ထင်သွားစေတယ်။
တကယ်လို့များ စုစုထွေးက အဲ့နေ့မှာ သူ့ရဲ့ ခံစားချက် တဝက်လောက်ကို ထုတ်ပြခဲ့မယ်ဆိုရင် မောင့်ရဲ့ ရွေးချယ်မှုက စုစုထွေးကိုပဲ ဖြစ်လာလိမ့်မယ်လို့ ထင်မိတယ်။

3️⃣ ဘာလို့ ဝေးကွာသွားခဲ့ကြရသလဲ။

သေချာတာကတော့ မောင်ရော စုစုထွေးရော တစ်ယောက်ကိုတစ်ယောက် သိပ်ကို ချစ်မြတ်နိုးခဲ့ကြတာပါပဲ။ ဒါနဲ့များ ဘာကြောင့် ဝေးသွားရသလဲဆိုရင် တစ်ယောက်နဲ့တစ်ယောက် ခံစားချက်ကို ဖော်ပြပုံချင်းမတူတာကြောင့်လို့ ပြောရမှာပါပဲ။
မောင်က သူမကြိုက်တဲ့အရာဆိုရင် မကြိုက်
ကြောင်း ပွင့်ပွင့်လင်းလင်းထုတ်ဖော်ပြောပြတတ်တယ်။
စာဖတ်ပရိတ်သတ်ယောကျာ်းလေးတွေနဲ့ စကားပြောကြာရင် သိသိသာသာစိတ်ဆိုးပြတယ်။
ယောကျာ်းလေးအပေါင်းအဖော်တွေနဲ့ လက်ဖက်ရည်
ဆိုင်ထိုင်ရင် မကြိုက်ကြောင်းပြောတယ်။
ခရမ်းပြာရောင်နဲ့ မလိုက်ရင် မလိုက်ကြောင်း၊ နောက်ဆုံး သူမကြိုက်တဲ့ စကားတစ်ခွန်းပြောမိတာတောင် ချက်ချင်းမျက်နှာပျက်ပြီး ဒေါသတကြီးနှင့် မကြိုက်ကြောင်းကို ဘွင်းဘွင်းရှင်းရှင်း ထုတ်ဖော်ပြသတတ်သူဖြစ်တယ်။

စုစုထွေးကတော့ အတွေးများသလောက် စကားနည်းတဲ့ မိန်းမတစ်ယောက်လို့ပဲ ဆိုရမည်။ ပြောပြမှ သိမည်ဆိုလျှင် အသေသာခံလိုက်မည်၊ ပါးစပ်ကတော့ ထုတ်ပြောမနေနိုင်ဘူးဆိုသည့် လူစားမျိုး။
အတွေးသမားဖြစ်တာမို့ မောင့်ရဲ့ မျက်နှာရိပ်မျက်နှာကဲတစ်ခုချင်းစီကို အမြဲကြည့်နေတတ်ပြီး ဘယ်လိုသဘောထားရှိတယ်ဆိုတာ အမြဲဖမ်းမိဖို့ ကြိုးစားနေခဲ့တတ်ပေမဲ့ ကိုယ့်စိတ်ထဲက အတွေးကို ကိုယ်
ကိုယ်တိုင်ပဲ အမှားအမှန်ဆုံးဖြတ်တတ်တဲ့ အကျင့်က မောင့်ရဲ့ သဘောထားအမှန်ကို တွေ့ရှိဖို့ ခဲယဉ်းသွားတာလည်းဖြစ်နိုင်ပါတယ်။

တကယ်ဆို မောင်က စုစုထွေးကိုလည်း သူ့လိုမျိုးပဲ တဖြောင့်တည်းတွေးခဲ့တာဖြစ်နိုင်တယ်။
စုစုထွေးက စိတ်ဆိုးပြီး မထိနှင့်ဆိုရင် ချက်ချင်းပဲ ခပ်ခွါခွါ နေတတ်တဲ့သူဖြစ်တယ်။ တကယ်တော့ မထိနဲ့ဆိုတာ ကျွန်မကို ပွေ့ဖက်ပြီး ချော့ပေးပါ ဆိုတဲ့ သဘောလို့သာပြောရင် ခုချိန်ဆိုလည်း မချော့တတ်တဲ့ မောင်
တစ်ယောက် မျက်စိလည်သွားလောက်မှာ သေချာပါတယ်။ ဒါမှမဟုတ် ရူးနှမ်းလိုက်တာလို့ ရေရွတ်
လောက်တယ်။

အကယ်၍ ဒီလိုကိစ္စတွေကို သိရှိသွားလို့ အချိန်တွေနောက်ပြန်ဆုတ်ပြီး ဒီဖြစ်ရပ်ကို ပြန်သွားမယ်ဆိုရင် မောင်က စုစုထွေးကို ရွေးချယ်ဖို့ကြိုးစားလောက်ပြီး စုစုထွေးကတော့ သူ့မူအတိုင်း အတွေးများစွာနဲ့ မောင့်ကိုလက်မခံဖို့ ရွေးချယ်မှာလို့ ခံစားရတယ်။

ဘယ်လိုပဲဖြစ်ဖြစ် မောင်နဲ့စုစုထွေးက လားရာမတူတဲ့ မျဉ်းနှစ်ကြောင်းပဲမို့ တစ်ကြိမ်ဆုံပြီးရင် တစ်သက်ပြန်ဆုံဖို့ မဖြစ်နိုင်တဲ့ ဆက်ဆံရေးလို့ပဲ မြင်မိပါတယ်။

#ဂျူး #အမှတ်တရ

28/10/2026

မင်္ဂလာပါခင်ဗျာ
English လိုရေးထားတဲ့ ကလေးကာတွန်း စာအုပ်လေးတွေ၊ ကလေးပုံပြင်လေးတွေ ဖတ်လေ့ရှိတဲ့ စာကြည့်တိုက်ဖြစ်ဖြစ်၊ ကျောင်းဖြစ်ဖြစ်၊ mobile library ဖြစ်ဖြစ် ရှိလား မသိဘူးဗျ။
ဒါမှမဟုတ် ကလေးလေးတွေကို English စာအုပ်လေးတွေနဲ့ ထိတွေ့စေချင်တဲ့ စာကြည့်တိုက်မှူးတွေ၊ ဆရာတွေရှိရင်လည်း ပြောလို့ရပါတယ်။
ကျွန်တော့်ဆီမှာ page ကနေပြီး အစ်မတစ်ယောက်က ကလေးဖတ် English စာအုပ်လေးတွေ အများကြီး လာလှူထားတာရှိလို့ပါ ❤️

ဒီတိုင်း စာကြည့်တိုက်တွေကို ပို့လိုက်ရင်လည်း ရပေမဲ့ English စာအုပ်လေးတွေမို့ တကယ်ဖတ်နိုင်၊ ဖတ်ချင်တဲ့ နေရာလေးတွေကို ပို့ပေးချင်လို့ပါ။

အရင်ကတော့ ပေးမဖတ်ဖူးဘူး၊ ဒါပေမဲ့ ကိုယ့်ကလေးတွေနဲ့ try ကြည့်ချင်တယ်ဆိုတဲ့ ဆရာတွေရှိရင်လည်း welcome ပါဗျာ၊ ကလေးတွေနဲ့ စာအတူဖတ်ကြတဲ့ process လေးသာ သေချာပြနိုင်ရင် အဆင်ပြေပါတယ်ဗျ။ အဓိကက ပို့လိုက်တဲ့ စာအုပ်တွေ ဖတ်ဖြစ်ဖို့ပါ။

#စာအုပ်အလှူ

Photos from Nourish by Kenneth's post 23/10/2026

ပြောင်းလဲသွားသော မျက်နှာဖုံးဒီဇိုင်းများနှင့် စိတ်ခံစားချက်များ

စာအုပ်တစ်အုပ်ဟာ နာမည်ကြီးရင် ကြီးတဲ့အလျောက် အကြိမ်ရေတွေ ထပ်မံထုတ်တာ သဘာဝပါပဲ။
ဒီလိုထုတ်တဲ့အခါ အချို့က မူရင်းစာအုပ်ရဲ့ပုံစံမပျောက်ပျက်သွားအောင် စာအုပ်မျက်နှာဖုံးတစ်မျိုးတည်းနဲ့ပဲ ထုတ်ကြတာရှိသလို အချို့ကလည်း စာဖတ်သူအသစ်တွေကို ဖိတ်ခေါ်ဖို့၊ ဝတ္ထုပါအကြောင်းအရာအချို့ကို highlight တမျိုးဖော်ပြဖို့ မျက်နှာဖုံးဒီဇိုင်းအသစ်တွေကို ပြောင်းလဲ အသုံးပြုကြပါတယ်။

ဒီထဲမှာ ဆရာမ ခင်ခင်ထူးရဲ့ နာမည်ကြီး ဝတ္ထုစာအုပ်တွေလည်း ပါပါတယ်။
ဆရာမကတော့ မျက်နှာဖုံးတစ်မျိုးတည်းထက် စာဖတ်သူတွေကို အမြင်သစ်ခံစားစေချင်တာကြောင့်လား၊ မျိုးဆက်သစ်စာဖတ်သူတွေကို ဖိတ်ခေါ်ချင်တာကြောင့်လား၊ တခြားကိုယ်မတွေးမိတဲ့ ရှုထောင့်တစ်ခုခုကြောင့်လားမသိ စာအုပ်တွေ ပြန်လည်ပုံနှိပ်တိုင်းမှာ မျက်နှာဖုံးဒီဇိုင်းအသစ်တွေကို သုံးလေ့ရှိပါတယ်။

အမြင်သာဆုံးကတော့ မအိမ်ကံနဲ့ တောမင်းသမီးပါ။ (ခု ဒီစာကို ရေးဖြစ်တာလည်း တောမင်းသမီး ရဲ့ မျက်နှာဖုံးဒီဇိုင်းသစ်ကြောင့်ပါ)

ကိုယ်ကြိုက်နှစ်သက်တဲ့ ဝတ္ထုကို မျက်နှာဖုံးဒီဇိုင်းအသစ်တွေနဲ့ မြင်ရတာ စာအုပ်ချစ်သူတွေအတွက် တကယ်ကို စိတ်လှုပ်ရှားစရာပါပဲ။ (Book Collector တွေဆို ဒီခံစားချက်ကို ပိုသိမယ်ထင်ပါတယ်)

တဖက်မှာလည်း ကိုယ်ဖတ်ခဲ့တဲ့ စာအုပ်ထဲက အကြောင်းအရာတွေ၊ ကိုယ့်စိတ်ကူးပုံဖော်ထားမှုတွေ၊ ကိုယ်စဖတ်ခဲ့စဉ်တုန်းက ထိတွေ့ခဲ့တဲ့ စာအုပ်ဒီဇိုင်းရဲ့ ပုံရိပ်လွှမ်းမိုးမှုတွေကြောင့် ဒီဇိုင်းအသစ်တွေထွက်လာတဲ့အခါ စိတ်ကသိကအောင့်ဖြစ်တတ်ပါတယ်။

ကျွန်တော့်တကိုယ်တည်းအမြင်အရဆို ခုနောက်ပိုင်းထုတ်လာတဲ့ မအိမ်ကံနဲ့ တောမင်းသမီး စာအုပ်ဒီဇိုင်းတွေကို သိပ်ပြီးမကြိုက်ပါဘူး။
Design တွေက modernize ဖြစ်လွန်းပြီး ဝတ္ထုထဲပါ အကြောင်းအရာတွေကို မဖော်ပြနိုင်တဲ့အပြင် ဝတ္ထုရဲ့ဝိတ်ကိုပါ လျော့ပေါ့သွားစေတယ်လို့ ခံစားရပါတယ်။ (စာအုပ်မျက်နှာဖုံးလေးတစ်ခုကြောင့် အထဲက စာပေအရည်အသွေးလျော့ကျသွားတယ်လို့ ဆိုလိုတာမဟုတ်ပါဘူးနော်၊ ဝတ္ထုတွေကတော့ အမြဲတမ်း masterpiece တွေ ဖြစ်နေမှာပါ)

မအိမ်ကံကိုဆို ကိုယ်ဖတ်တုန်း ပ/ဒု ဒီဇိုင်းနဲ့ ဖတ်ခဲ့ရတော့ ည ၁၂ကျော်ထိ ဖတ်နေရင်း စာအုပ်ထဲက မျက်နှာက ကိုယ့်ကိုကြည့်နေသလို ခံစားလာရလို့ အမေ့အခန်းထဲပြေးဝင်သွားအိပ်ရတဲ့အထိ စိတ်ထဲနှစ်ပြီး သဘောကျခဲ့ရတာပါ။ တတိယအကြိမ်နဲ့ စတုတ္ထအကြိမ်ထုတ်ဟာဆိုလည်း တကယ်ကို သဘောကျတဲ့ထဲပါပါတယ်။
သတ္တမအကြိမ်ထုတ်ဟာဆိုလည်း ဝတ္ထုကို တမျိုးတမည်လေးနက်စေတယ်လို့ ခံစားရလို့ သဘောကျပါတယ်။
ကျန်တဲ့အကြိမ်ထုတ်ဟာတွေကိုတော့ ကိုယ့်သဘောနဲ့ သိပ်ပြီး မကိုက်ပါဘူး။ (ဖြစ်နိုင်ရင် မအိမ်ကံစာအုပ်ကို ရှေ့အကြိမ်တွေလိုမျိုး လေးလေးပင်ပင်ညှို့ညှို့မှိုင်းမှိုင်းနဲ့ ခေတ်တစ်ခုကို ပြန်လည်ခံစားသွားရစေတဲ့ ပုံစံမျိုးနဲ့ပဲ ရှိစေချင်တာပါ)

တောမင်းသမီးဆိုလည်း ရှေ့ပိုင်းထုတ်ခဲ့တဲ့ဟာတွေကြိုက်ပေမဲ့ ခုနောက်ဆုံးထုတ်တဲ့ဟာဆို ခံစားပေးလို့မရပါဘူး။ (တချို့တွေကြိုက်ကြတာလည်း တွေ့ရပါတယ်)

စာအုပ်တစ်အုပ်ကောင်းမကောင်းကို စာအုပ်မျက်နှာဖုံးနဲ့ ဆုံးဖြတ်မရဘူးဆိုပေမဲ့ Visual ကလည်း လူတွေရဲ့ emotion ကို ထိတွေ့တဲ့အခါအရေးပါတာမို့ မျက်နှာဖုံးပေါ်မှာမူတည်ပြီး စာအုပ်အပေါ်ခံစားရတဲ့ အမြင်တွေကတော့ တည်ရှိနေဦးမှာပါ။

P.s. ယခုစာသည် တစ်ဦးတည်းခံစားချက်ဖြစ်ပြီး post ပါ ပုံများအတွက်လည်း ပိုင်ရှင်များကို လေးစားစွာ credit ပေးပါသည်။

#ခင်ခင်ထူး #မအိမ်ကံ #တောမင်းသမီး

Photos from Nourish by Kenneth's post 23/10/2026

သဲချောင်းခဲဘောင်ကို ရောက်ရှိသွားပြီဖြစ်တဲ့ စာအုပ်လေးတွေ..💛

အခုဆိုရင် “စာဂံနဲ့အတူ ဒို့ဖေးကူ” project က လှူဒါန်းပေးပို့ထားတဲ့ စာအုပ်လေးတွေဟာ ဧရာဝတီတိုင်းဒေသကြီး၊ ကျုံပျော်မြို့နယ်ရဲ့ သဲချောင်းခဲဘောင်ဆိုတဲ့ကျေးရွာက မူလတန်းကျောင်းလေးဆီကို ချောချောမွေ့မွေ့ရောက်ရှိသွားပြီဖြစ်ပါတယ်။

စာအုပ်ဝယ်ယူဖတ်ရှုဖို့ ခက်ခဲတဲ့နေရာလေးမို့ စာအုပ်တွေ ခုလိုရောက်ရှိပြီး ကလေးလေးတွေ စတင်ဖတ်ရှုနေတာ တွေ့ရတာ အတိုင်းမသိကို ဝမ်းသာကြည်နူးရပါတယ်ခင်ဗျာ 🫶🏻

#စာဂံ #စာဂံနဲ့အတူဒို့ဖေးကူ #စာကြည့်တိုက် #စာအုပ်အလှူ

Photos from Nourish by Kenneth's post 18/10/2026

တရုတ်မုန့်ကြိုက်တဲ့သူတွေအတွက် Hidden Paradise လေး 🥢

Istanbul မှာ နေတဲ့သူဆို Taksim က China Market ကို အတော်များများသိပြီး ဖြစ်မှာပါ။
ခု ဒီဆိုင်လေးကတော့ Taksim က မဟုတ်ဘဲ Fatih မှာရှိတဲ့ Mabbodina ဆိုတဲ့ တရုတ်မုန့်တွေရောင်းတဲ့ဆိုင်လေးပါ။

Taksim ဘက်က ဆိုင်လေးက ဟင်းချက်ရင် သုံးတဲ့ ပါဝင်ပစ္စည်းလေးတွေ ရောင်းတာများပြီး ခု ဒီဆိုင်လေးကတော့ အသင့်စား တရုတ်မုန့်လေးတွေ ရောင်းတာပိုများပါတယ်။

ကျတော်ကတော့ တရုတ်မုန့် ပေါက်စန အထုတ်သေးလေးတွေ၊ အစပ်ပြားတွေ၊ ခေါက်ဆွဲခြောက်ထုပ်တွေ စားရတာကြိုက်တဲ့သူမို့ ဒီဆိုင်လေးက အတော်ကို အဆင်ပြေပါတယ် 🫶🏻

မုန်ုထုပ်အသေးလေးတွေဆို 60TL လောက်ကစပြီး အစားစားရှိပါတယ်။ ဆိုင်ရှင်တွေကလည်း သဘောကောင်းပါတယ်၊ စျေးလည်းလျှော့ပေး မုန့်ထုပ်တွေလည်း အပိုထည့်ပေးတယ် 🥲🫶🏻

ဆိုင်ရဲ့ Google Map Link လေးကို comment မှာ ချပေးထားပါမယ်ခင်ဗျာ 🧡

Photos from Nourish by Kenneth's post 15/10/2026

🇹🇷 Istanbul မှာ နေထိုင်သူတိုင်း သိထားသင့်တဲ့ ရေ၊ မီး၊ Gas ပြတ်တောက်မှု စစ်ဆေးနည်းများ 🚨

Istanbul မှာနေရင်း ရုတ်တရက် ရေပြတ်၊ မီးပြတ်သွားတဲ့အခါ ကိုယ့်တစ်အိမ်တည်း ဖြစ်တာလား၊ ရပ်ကွက်လိုက် ပျက်တာလား၊ ဘယ်အချိန် ပြန်လာမှာလဲဆိုတာ သူများမေးစရာမလိုဘဲ ကိုယ်တိုင် အလွယ်တကူ ဝင်စစ်လို့ရတဲ့ နည်းလမ်းလေးတွေကို စုစည်းပေးလိုက်ပါတယ်။

💧 ၁။ ရေပြတ်တောက်မှု စစ်ဆေးရန် (Su Kesintisi - İSKİ)
တစ်မြို့လုံးရဲ့ ရေပေးဝေရေးကို İSKİ က တာဝန်ယူထားပါတယ်။

(ကျွန်တော်ကတော့ website ကနေပဲ အမြဲကြည့်ပါတယ်၊ တစ်ခုရှိတာက အချိန်ကတော့ ရွှေ့ရွှေ့သွားတတ်ပါတယ် 🥲)

✅ Website ကနေကြည့်ရန်: iski.istanbul/abone-hizmetleri/ariza-kesinti လင့်ခ်ထဲဝင်ပြီး ကိုယ်နေတဲ့ မြို့နယ် (İlçe) နဲ့ ရပ်ကွက် (Mahalle) ကို ရွေးလိုက်ရုံနဲ့ ဘာကြောင့်ရေပြတ်တယ်၊ ဘယ်အချိန် ပြန်လာမယ် (Completion Date) ဆိုတာ အတိအကျ ပေါ်လာပါတယ်။

✅ e-Devlet: Search bar မှာ "İSKİ Günlük Arıza Kesinti Bilgileri" လို့ ရိုက်ရှာပြီး ကြည့်နိုင်ပါတယ်။ (ဒါက တစ်ခါတလေ update တန်းမဖြစ်ဘဲ result မပြတတ်ပါဘူး)

✅ Hotline: ဖုန်းနံပါတ် 185 (သို့မဟုတ် 153) ကို ခေါ်လိုက်ရင် Operator နဲ့တောင် ပြောစရာမလိုဘဲ လက်ရှိ ရေပြတ်နေတဲ့ ရပ်ကွက်နဲ့ ပြန်လာမယ့်အချိန်ကို Automated Voice က အော်တို ကြေညာပေးပါတယ်။

⚡ ၂။ လျှပ်စစ်မီးပြတ်တောက်မှု စစ်ဆေးရန် (Elektrik Kesintisi)
Istanbul မှာ လျှပ်စစ်မီးကို ဥရောပခြမ်းနဲ့ အာရှခြမ်း ကုမ္ပဏီ (၂) ခု ခွဲယူထားပါတယ်။

✅ ဥရောပဘက်ခြမ်း (Avrupa Yakası - BEDAŞ): Beyoğlu, Şişli, Fatih, Beşiktaş, Kağıthane စတဲ့ ဥရောပခြမ်း (၂၅) မြို့နယ်အတွက် bedas.com.tr (သို့မဟုတ် BEDAŞ 186 App) မှာ ဝင်စစ်နိုင်ပါတယ်။

✅ အာရှဘက်ခြမ်း (Anadolu Yakası - AYEDAŞ): Kadıköy, Üsküdar, Ataşehir, Maltepe စတဲ့ အာရှခြမ်း (၁၄) မြို့နယ်အတွက် ayedas.com.tr (သို့မဟုတ် AYEDAŞ 186 App) မှာ စစ်နိုင်ပါတယ်။

✅ Hotline: မီးပြတ်ရင် ဥရောပခြမ်းရော အာရှခြမ်းပါ ဖုန်းနံပါတ် 186 ကို ဆက်ပြီး မီးပြန်လာမယ့်အချိန် မေးလို့ရပါတယ်။

🔥 ၃။ သဘာဝဓာတ်ငွေ့ စစ်ဆေးရန် (Doğalgaz - İGDAŞ)
တစ်မြို့လုံးရဲ့ Gas ကို İGDAŞ က တာဝန်ယူထားပြီး တော်ရုံတန်ရုံ ပြတ်လေ့မရှိပါဘူး။

✅ Hotline: တကယ်လို့ Gas မလာတာ သို့မဟုတ် အနံ့ထွက်နေတာမျိုးဆိုရင် 24/7 အရေးပေါ်ဖုန်းနံပါတ် 187 ကို ချက်ချင်း ခေါ်ဆိုနိုင်ပါတယ်။

အရေးပေါ်ဖုန်းနံပါတ်များ အလွယ်မှတ်နိုင်ရန်
📞 ရေ (İSKİ): 185
📞 မီး (BEDAŞ / AYEDAŞ): 186
📞 Gas (İGDAŞ): 187
📞 Istanbul စည်ပင် (İBB Çözüm Merkezi): 153

Other Istanbul beauty salons

Show All
  • Stilyoner VIP

    Stilyoner VIP

    Portakal Yokuşu Caddesi Aydınlık Sokak, 78/4, Ortaköy Mah, Istanbul 34347

    Günlük Stilyoner Fırsatları

  • Hunca Cosmetics

    Hunca Cosmetics

    Büyükdere Caddesi 1. Levent Plaza No:173/A Kat:10 Şişli/Istanbul, Istanbul 34394

    The best Turkish cosmetics company - Hunca Cosmetics since 1957... Official Facebook fan page. Welco

  • MAKE UP FUNDA Boldurnaz

    MAKE UP FUNDA Boldurnaz

    Beykoz Kundura Fabrikası Film Platosu, Istanbul

    02322501811 İNÖNÜ CADDESİ NO.194 K.3 D.8 İZMİR

  • L'Oréal Group

    L'Oréal Group

    Dr. Adnan Büyükdeniz Cad. Saray Mahallesi Akkom 2. Blok K: 14-16, Istanbul 34768

    Tüm dünyaya kozmetik sektörünün en yenilikçi ürünlerini sunarken gezegenimizin sınırlarına ve çeşitli

  • Ateş Sauna

    Ateş Sauna

    Selimiye Mahallesi Selimiye Kışla Caddesi No:8 Üsküdar, Istanbul 34668

    Ateş Sauna, Spa Merkezi. Bir Günüzü Kendinize Ayırın.

  • Nattuura Saglik Guzellik ve Estetik Merkezi

    Nattuura Saglik Guzellik ve Estetik Merkezi

    Halaskargazi Caddesi Tavukçu Fethi Sokak No: 15/2 Pangalti, Şişli, Istanbul TEL:02122198653

    http://www.nattuura.com/ Randevu ile çalışıldığı için çalışma saatleti değişiklik gösterebilir.

  • Bebeimgeliyor

    Bebeimgeliyor

    Bostancı Prof Dr Ali Nihat Tarlan Cd Ada Apt A Blok K:3 D:8, Istanbul

    Danışmanlık Dogum,Emzirme,Bebek bakımı,Lohusalik hakkında egitimler vermektedir! Bebeimgeliyor Anne Bebek Eğitim Merkezinde eğitimlere devam ediliyor.

  • Fatoş Güzellik

    Fatoş Güzellik

    Fenerbahçe Kalamış Kadıköy, Istanbul 34718

    Fatoş Güzellik Kalamış

  • Studio hair&makeup

    Studio hair&makeup

    Şenlikköy Mahallesi AltıEkim Sk. No:10 Bakırköy Florya, Istanbul 34153

    Kader Keren & Önay Özdemir

  • CX PROFESYONEL MAKE UP

    CX PROFESYONEL MAKE UP

    DÜNYA SAĞLIK Sokak OPERA İŞ MERKEZİ NO 25 D :7 GÜMÜŞSUYU TAKSİM/İST, Istanbul 34000

    güzellik ,bakım,saç ve makyaj konularında 39 yıllık bir deneyime sahip TKM( TAKSİM KUAFÖR MA

  • Make up Artist

    Make up Artist

    Istanbul

    Fashion Makeup Artist

Alerts

Be the first to know and let us send you an email when Nourish by Kenneth posts news and promotions. Your email address will not be used for any other purpose, and you can unsubscribe at any time.

Subscribe

We will notify you when anything happens in Istanbul.