Slayed by SUBH

Un wikènt tras di lomba ku un suseso ku a hala bastante atenshon den nos komunidat na unda hóben nan ta haña nan ku problema ku otro I esaki ta terminá den un kaso di tiramentu.

Mi tambe komo un hóben esaki tin mi for di ora ku mi a tende loke a pasa tristu I ta pensa so. E último aña nan aki e situashon bou di nos hóben nan ta birando pió. Un par di aña pasa mi amigu Roald balentin a kanta un kantika “ Unda nos ta bai”.

Aworakí mi pregunta ta UNDA NOS TA?

Komo un hóben ku for di chikitu tabata aspirá e karera polítiko esaki tin mi atenshon kompletu paso mi tambe ta un hóben. Pa esun nan ku konosé mi sa ku mi tambe ku gusta kue mi moveshon nan i pasa un ratu great. Mirando kon e ambiente ta birando na Kòrsou esaki no ta duna bu e gana pa bai hasi esaki mas, siendo ku nos ta biba na un lugá hopi hende ta deseá di por ta biba i nos mes ta kabando ku esaki.

Wèl mi ta konta mi historia mas kòrtiku ku ta posibel i spera e por inspirá e hóben na pa por subi e kaminda korekto.

Semper mi tabata un hende ku tabata tin “wowo grandi” manera nan ta yam’é den boka di pueblo. Mi tabata gusta kos nan nechi i karu semper. Mi tambe no tabata gusta siña i mi no tabata mira e pakiko mi mester a bai skol.

Den e edat nan di 14-18 aña manera nos tur sa ta un edat kaminda bo ta kuminsá sinti bu grandi i bo ta “rebeldia” i tur hende tin e fase nan ei.

Mi a keda sinta pa promé bes den mi bida den 3de HAVO i despues mi a drùip 2 bia den HAVO 5 pero mi tabata tin un temporada hopi dushi na middelbare school. Na e momentu ku mi a kaba esaki mi no tabata tin un richting di estudio ku mi kier a hasi pa mi parti e tempu ei mi no a bai skol mes paso e kos ei ta “kansa hende”. E úniko kos ku mi tabata ke ta bira POLIS i te awe esei ta mi deseo.

Mi a kuminsá un richting di HBO ku mi no tabata gusta i mi a stòp i kuminsá traha. Trahando ma kuminsá mira ku si ta HAVO so bo tin nunka mi lo por yega na e loke nan mi ke. Ei nan ma mira e importansha di un estudio. Mi a disidí di bai hasi mi “Bachelor in Business Administration major in General Management di kua mi a finalisá esaki ku éksito. Kabando esaki mi a haña oportunidat pa sigui krese den mi trabou i e sensashon di tin bo Diploma ku ningun hende lo por kita for di bo hamas paso e ta BO LOGRO, ta un sensashon ineksplikabel.

Seguidamente ma kuminsá sinti e dushi di krese komo hende i den mi trabou i mi a opta pa bai siguí mesora su tras ku mi “Master in Business Administration major in General Management” kual ku Dios su poder mi ta finalisá e aña aki.

E sakrifisio nan hasi tabata i ketu bai ta grandi. Paso traha i studia no ta niun tiki fásil pero den e bida aki bo mester buta bo meta nan ku bo ke logra i wak prinsipal kiko ta bal mas tantu. Hopi soño pèrdí “Late nights, early mornings” e hende nan ku ta volg mi via snapchat sa e pida ei. Pero esaki nan tur ta duna fruta despues.

Hóben nan ku esaki mi ke ilustrá na boso nan ku trahando humildemente sin mester buska problema pa bosnan kurpa bo por yega na tur kos ku bo tin gana basta bo buta meta i traha duru pa logra esaki. I no tin ningun sensashon mas dushi ku na momentu ku bo logra esaki. Kere mi ku pas mental i trankilidat ta bal muchu mas ku kualke otro kos.

Promé mi finalisá mi kier a duna un rekonosementu na radio MASS99 ku e desishon tuma pa ku e kantika nan aktual ku ta hopi agresivo i hopi di nos hóben nan ta siguí esaki nan fiel.

Ku esaki mi ta reta tur nos polítiko nan aktual i nos eks polítiko nan pa ban kuminsá ta un ehèmpel pa nos hóben nan paso si esnan ku tin ku dirigí mes ta konstantemente ta bezig ku agreshon verbal i/òf físiko. Konstantemente ta buska algu pa okashoná divishon den e puebel ta pió so nos por hasi esaki.

Ami tin un tempu ta traha riba mi mes pa ta un mihó hende tur dia di nobo. Ban ta positivo ban traha riba un mihó Kòrsou.

Ban uni vooral nos hóben nan. Nada di loke nan boso ta hasiendo no ta hasi bu mas tòf pero si bo ta daña bo bida i bo futuro i tambe di un otro hende pa semper sin tabata tin mester.

Pues uni ku mi i ban pe kambio. Un man ta laba otro na final nos tur mester di otro. Skibi pa Djurany Virginie!!