Awareness with Reham

🌿 سلسلة: طفلك بيقولك إيه من غير ما يتكلم؟

الجزء الثاني: طفلك بيكدب عليك… هو خايف منك؟

كام مرة اكتشفتي إن طفلك قال حاجة مش حقيقية، وطلع أول رد منك:

“إنت بتكدب عليا؟!”
“مين علمك الكدب؟”
“قول الحقيقة بدل ما أعاقبك!”

بس جربي تبصي للسلوك من زاوية تانية…

هو بيكدب عشان يضحك عليكي؟
ولا عشان خايف من رد فعلك؟

أوقات الطفل لما يكون متأكد إن اعترافه بالغلط هيجيب له زعيق أو عقاب، بيختار يخبي الحقيقة.

وده مش معناه إننا نقبل الكذب طبعًا…
لكن قبل ما نصحح السلوك، محتاجين نفهم إيه اللي خلاه يخاف يقول الحقيقة؟

ممكن تقولي له:

“أنا زعلانة إنك عملت كده، بس مبسوطة إنك قلتلي الحقيقة… تعالى نشوف هنصلح اللي حصل إزاي.”

لأن الطفل محتاج يتعلم إن الغلط له نتيجة… لكن قول الحقيقة مش جريمة.

والجزء الجاي؟
طفلك بيعيط على حاجات بسيطة… هو دلع؟ ولا بيحاول يقولك حاجة؟ 👀

تابعي الصفحة عشان نكمل السلسلة 🌿

Coach Reham | Family & Parenting Coaching
دمتم بوعي 🤍

اللي بينفصلوا بعد الجواز ، أو بيفركشوا خطوباتهم.، أو علاقاتهم بتبوظ في أي مرحلة

كانوا - في وقت ما - سعداء جدًا سوا ، سعداء بشكل ميخلكش تصدق إن الاتنين دول ممكن ينفصلوا ويبعدوا كمان كام سنة ، أو يمكن كام يوم

مع إن ده العادي في قصص الانفصال للأسف ؛ لأن الجواز والارتباط عشان يستمر عاوز مجهود ، مش مجهود عشان يحصل بس .. زرعة جميلة عاوزه عناية و اهتمام و
معافرة عشان متموتش .. ويمكن ده
السبب الرئيسي اللي بيخلي العلاقات العاطفية تبوظ في وقتنا الحالي ، حتى العلاقات الاجتماعية
زي الصداقة مثلًا ، وهي إن الطرفين بيتعاملوا مع العلاقة ما بينهم إنه خلاص بقى ، اتجوزنا فنسيب الأمور تمشي
لوحدها، مش محتاجة نبذل مجهود ولا نركز و لو شوية عشان الدنيا بينا متبوظش .. يمكن من السهل إن
الحب يحصل ،
لكن الصعب إننا نحافظ على الحب ده.

من أحلى المشاهد في فيلم " آسف على الإزعاج "، لما "
منة شلبي" بتسأل "أحمد حلمي" عن أمنية نفسه تتحقق؛ فبيقولها : " أنا نفسي تحبيني يا فريدة "؛ فترد عليه الرد اللي كتير مننا لسه مش مستوعبه كويس : "الحب مش أمنية يا حسن .. الأمنية إن الحب ده يدوم "

مفيش ضمانات لنجاح تجربة الارتباط ، حتى الحب ،
آه ياما ناس اتجوزوا عن حب و علاقاتهم باظت و انفصلوا بعد ما أرهقتهم .. كل علاقة صندوق حكاوي و مواقف و تفاصيل و تراكمات ، ومحدش يعرفها غير طرفيها ،

النتيجة بس هي اللي بتظهر للغريب .. فالحب بمعناه الواسع مش شيء لحظي ، مش حدث أو مشهد أو لقطة معينة .
دة رحلة طويلة فيها متاعب و مواقف صعبة ، زي ما فيها جمالها وخفتها ، اللي بتساعدنا إننا نكمل وسط كل
ضغوط الحياة اللي بنحاربها .

فربنا يرزقنا الطاقة اللي تخلينا نقدر نحافظ على
الحب من غير ما يتشوه ، ومن غير ما نوصل لدرجة يكون فيها الانفصال شيء حتمي وضروري ، حتى لو الحب لسه موجود.

🌿 سلسلة: طفلك بيقولك إيه من غير ما يتكلم؟

الجزء الأول: طفلك بيعاندك كتير… هو فعلًا عنيد؟

كام مرة قولتي:

«ابني ده عنيد بشكل مش طبيعي!»
«بنتي مبتسمعش الكلام خالص!»
«أنا بقول الحاجة مرة واتنين وعشرة!»

بس استني…

هو فعلًا عنيد؟ ولا فيه حاجة ورا السلوك ده؟

أوقات الطفل لما يرفض كل حاجة، أو يصر على رأيه، أو يعمل عكس اللي إنتِ طلبتيه… بيكون مش بس بيختبر حدودك.

ممكن يكون محتاج يحس إن رأيه مسموع.
ممكن يكون بيحاول يثبت استقلاله.
وممكن ببساطة يكون مش عارف يعبر عن اللي مضايقه بطريقة تانية.

وده مش معناه إننا نسيب الطفل يعمل اللي هو عايزه.

الحدود مهمة… لكن فهم السبب أهم.

لأن الفرق كبير بين إنك تقولي لطفلك:
«إنت عنيد!»

وبين إنك تسألي نفسك:
«هو بيحاول يقولّي إيه بالسلوك ده؟»

ودي أول نقطة في السلسلة…

لأن السلوك اللي هنشوفه في الجزء الجاي، أمهات كتير بتتعامل معاه كأنه مشكلة أخلاقية… وهو أحيانًا بيكون خوف.

تابعي الصفحة عشان الجزء التاني 🌸

Coach Reham | Family & Parenting Coaching
دمتم بوعي 🌿
#جلسات #كوتش #طفل #توعية

💍 الجواز التاني للأم… إيه اللي ممكن يحصل جوا نفسية الطفل؟

لما الأم تتجوز مرة تانية، الطفل ممكن يعيش مشاعر كتير في نفس الوقت…

ممكن يكون فرحان إن مامته مبسوطة، وفي نفس الوقت خايف إنها تبعد عنه أو تحبه أقل.

ممكن يحس إن الشخص الجديد أخد مكان الأب، حتى لو محدش قاله كده.

وممكن يظهر ده في صورة:

* عصبية أو عناد زيادة.
* غيرة من الزوج الجديد.
* تعلق شديد بالأم.
* تراجع في الدراسة أو تغير في سلوكه.
* رفض للشخص الجديد أو التعامل معاه بعدوانية.
* عند المراهق تحديدًا، ممكن يظهر في صورة تمرد أو انعزال أو رفض للحياة الجديدة.

وده مش معناه إن الجواز التاني غلط.
لكن معناه إن الطفل محتاج وقت وأمان عشان يستوعب التغيير.

طيب نحافظ على نفسية الطفل إزاي؟ ❤️

1️⃣ طمني طفلك إن مكانه ثابت.
قولي له بشكل واضح:
“جوازي مش معناه إنك بقيت أقل أهمية عندي، ومكانك عندي عمره ما هيتغير.”

2️⃣ متطلبيش منه يحب زوجك فورًا.
العلاقة محتاجة وقت.
خليه يتعرف عليه ويكوّن علاقته بيه بشكل طبيعي، من غير ضغط:
“ده بابا الجديد ولازم تحبه وتسمع كلامه.”

3️⃣ متدخليش الطفل في صراعات الكبار.
خصوصًا لو فيه خلافات مع الأب البيولوجي.
الطفل مش محتاج يبقى رسول بين الأب والأم، ولا يسمع كلام يقلل من أي طرف.

4️⃣ حافظي على وقت خاص بينك وبين طفلك.
حتى بعد الجواز، خلي فيه وقت ثابت ليكم أنتم الاتنين، يحس فيه إن علاقتكم لسه موجودة ومهمة.

5️⃣ متطلبيش منه يتنازل عن مشاعره.
لو قال: “أنا مش بحبه” أو “أنا عايز بابا”
مترديش: “إنت لازم تحبه” أو “خلاص بقى ده جوزي.”
ممكن تقولي:
“أنا فاهمة إن الموضوع جديد عليك، ومن حقك تاخد وقتك.”

6️⃣ لو الطفل أو المراهق بدأ يتغير بشكل واضح ومستمر، متعتبريش ده دلع.
التغير الشديد في السلوك، الانعزال، العدوانية، اضطراب النوم أو الدراسة، أو استمرار الضيق لفترة طويلة… يستحق إننا نقف معاه ونفهم إيه اللي جواه، ولو احتاج الأمر نستعين بمتخصص.

وفي الآخر…

مش الجواز التاني هو اللي بيكسر نفسية الطفل.
اللي ممكن يأذيه هو إنه يحس إنه فقد أمانه، أو فقد مكانه عند أمه، أو إن مشاعره مش مسموح بيها.

الجواز ممكن يكون بداية حياة مستقرة وجميلة للأم والطفل معًا…
لما ندخل الحياة الجديدة بهدوء، ووعي، ومراعاة لمشاعر الطفل. 🌿

دمتم بوعي ❤️
كوتش ريهام #زواج #ثانى #تربية #توعية #طفلك #جلسات #كوتش

ألفاظ مهمة جدا لازم نخلي بالنا منها أدام الأطفال حتى لو بهزار زي مثلاً...
- ايه يابنتي إنتي عامية!!!
- إنت أحول؟
- ليه إنت ناقصك إيد ولا رجل.
- إنت تعبان في دماغك
- إنت معاق!!
- إيه اطرشت خلاص مش سامع!

مصطلحات زي دي كتير هتخلي الطفل لو قابل حد كفيف فعلاً مش بيشوف أو حد ذوي إحتياجات خاصة أو أي كان الفئة..
هيحس انه أحسن منهم او انهم ناقصهم حاجة عنه و بالتالي إحنا كدة بنربي جيل عنصري و أناني..
لازم نمنع المصطلحات دي نهائي حتى لو بهزار أدام الأطفال و نعلمهم إن الناس دي حوالينا فعلاً بس هما مش أقل مننا في حاجة بل فيه منهم نماذج كتير ناجحة ومشرفة يمكن أكتر مننا.
خلوا بالكوا من كل ألفاظكوا أدام الأطفال لأنهم بيسمعوا كل حاجة مننا و بتتخزن عندهم سواء في الشعور أو اللاشعور و أكيد أكيد هتأثر في شخصياتهم 🌿
دمتم بوعى 🌸

إزاي أطلع إبنى حنين ورحيم وشخصيته سوية ؟

ج / أولاً تاخد بالك إنك مراية لإبنك، يعني عين بتراقبك ٢٤ ساعة وبتقلدك وبتكتسب منك صفاتك وردود أفعالك ..

صاحب إبنك من وهو صغير ، قرب منه و إحتويه وخليك حنين عليه ، لما يغلط علمه الصح من غير عنف ، عاقبه في مصروفه في الهدايا في الخروج في الحاجات الحلوة إللي بتشتريها ليه ، وعقاب مؤقت

إوعى تقلل من كرامته أو تستخدم العنف معاه لإن نتيجته عكسية ، وممكن يكرهك ، أو يتعقد نفسيًا ، خليه يخاف من زعلك مش من إيدك هتفرق كتير

علمه الحرام والحلال ، طلع صدقة أُدامه ، إديله فلوس يطلعها بنفسه للغلابة وفهمه بتعمل كدة ليه عشان تزرع في قلبه الرحمة ، و إوعى تئذى مامته أُدامه لإنه ممكن يكرهك بسبب أذيتك ليها ، و إختلافكم يكون بعيد عنه ، لإن الخناقات والخلافات بتأثر في الطفل

إتكلم عن مامته بالخير ، والأم تتكلم عن الأب بالخير حتى لو كارهين بعض ، أكتر حاجه بتأثر في نفسية و حياة الأولاد في المستقبل شكل العلاقة بينكم .. دة أمر عظيم

قبل ماتقسى على طفلك بص في عينه كويس عشان العين إللي بصالك دي بتسجل كل لحظة إنت بتقسى عليه فيها .

عارف ليه ابنك فى التمرين بيفضل يناديك عشان تتفرج عليه؟!
عارف ليه مبيجريش على حد بورقة الامتحان غير عليك إنت ويفضل واقف أدامك عشان يسمع رأيك فيه؟!
عارف ليه لما بيصلي بييجي يفرش السجادة أدامك انت وبعد ما يسلم يفضل قاعد مستني كلمة منك؟!
لإنه ببساطة بيستمد كيانه وروحه ونظرته لنفسه من نظرتك إنت ليه ...
لو العالم كله قال له إنه كويس وإنت مش شايفه كدة عمره ما هيشوف في نفسه خير.
ولو كل العالم حاولوا يثبتوله ضعفه وفشله ويقللوا من قيمته ... برضه مش هيبص إلا في عيونك إنت ... ومش هيشوف صورته الا جوا عيونك انت بس.
يعني ولادنا بيستمدوا ثقتهم في نفسهم من ثقتنا احنا فيهم وتحفيزهم ودعمهم.
الطفل إللى شخصيته قوية إنت السبب في قوته والشخص المهزوز الضعيف نتاجك إنت برضه.
دائمًا قول له:
أنا بحبك
أنا فخور بيك
انت ممتاز
حتى لو هو مش كدة هيحاول يبقى كدة عشان يكسب ثقتك وتفضل تحبه و تفتخر بيه 🩵
دمتم بوعى 🤍