SunnySide Salon

Жадо ринбүүчи багшийн айлдвараас: Тухайлсан утга нь юу гэсэн үг вэ гэхээр Бодь мөрийн зэргийн хөтөлбөрийн дагуу эхлээд мөрийн ёзоор болсон буяны садныг шүтэх ёсыг гаргаад, түүний дараа шүтээд мөрийн зэрэгт хэрхэн яаж суралцах вэ гэдэг арга замыг номлоно гэсэн хоёр хэсэгт хуваагддаг.

Түүний эхний “мөрийн ёзоор буяныг саданг шүтэх ёс” нь энэ дотор гарч байна. “Гэтэлгэгч багш та нарт мөргөх болой” гэдгээр гэгээрэх зам мөрийн ёзоор болсон буяны садныг шүтэх ёсыг гаргаж байна.

Яагаад буяны садныг шүтэх ёс нь мөрийн ёзоор болж байгаа юм бэ, гэгээрэх зам мөрийн гол үндэс суурь болж байгаа юм бэ гэвэл Бодь мөрийн зэрэгт Гаадамбын лам Бодовын гэгээний айлдварыг эш татсан байдаг.

“Ертөнцийн үйл хараад хийж болох зүйл дээр ч сургаачин заагаач багш байхгүй бол бүтдэггүй юм. Тийм байтал дөнгөж муу заяанаас гараад арай гэж хүний төрөл авч, тэгээд урьд нь огт явж үзээгүй нэгэнд гэгээрлийн зам мөрөөр явахад хөтлөгч заагч буяны садан байхгүй бол хаанаас болох вэ дээ” гэж номлосон байдаг.

Сэтгүүлч: Би танаас хамгийн сүүлийн, хамгийн их асуухыг хүссэн асуултаа асуумаар байна. Та яг юуг мэддэг, бас чаддаг вэ?

ДАЛАЙ БАГШ: Би бусдыг хайрлан нигүүлсэж, өрөвдөж энэрч чадна. Миний чаддаг зүйл ердөө л энэ.

Жадо ринбүүчи багшийн айлдвараас: Бурханы бүх эрдмүүдийг нааш нь хураавал номын лагшин, дүрст лагшин гэдэг хоёрт хураагдана.

Тэгвэл номын лагшиныг ямар арга замаар олох юм бэ, түүний гол уг шалтгаан юу байна вэ гэвэл хоосон чанар тэргүүтэй гүнзгий үзлийн билгүүний тал юм. Дүрст лагшиныг олохын гол уг шалтгаан нь бодь сэтгэл, асрах нигүүлсэнгүй сэтгэл тэргүүтэн мөн юм.

Тэгэхээр энэ хоёрыг хослон барилдуулж байж энэ хоёрын нэгдмэл мөн чанартай бурханы хутгийг олдог учиртай.

Тиймээс Нагаржунай богд айлдахдаа “Буян үүгээр амьтан бүгд буяны болон билгүүний чуулганыг хураагаад буяны болон билгүүний чуулганаас гарсан дээд хоёр лагшинг олох болтугай” гэж ерөөл тавьсан байдаг.

Жадо ринбүүчи багшийн айлдвараас: Бурханы шашинд бүх юмс үзэгдэл үнэхээрийн бүтээгүй, би үгүй хоосон чанартай, үнэхээрийн бүтсэн би гэж байхгүй, би үгүй гэдгийг номлодог. Бусад шашинд үүнийг ерөөсөө номлодоггүй.

Тийм учраас бусад шашинд орчлонгийн ёзоор мунхагийг дарах арга замыг ерөөсөө номлоогүй байна. Ганцхан үүнийг бурханы шашинд номлосон байгаа учраас бурханы шашин бусад шашнаас илүү онцлогтой байна.

Бурханы шашин бол орчлонгийн зовлонгоос гарах арга замыг үнэн зөвөөр нь номлож чаджээ гэж хэлэх бүрэн боломжтой юм.

Далай багш: Би "Бодисадын явдалд орохуй" номоос зарим хэсгийг онцгойлон уншдаг юм. Тухайлбал:

"Ертөнцөд эдэлж буй зовлон бүхэн
Амин хувиа хичээснээс үйдэлтэй
Ертөнцөд эдэлж буй жаргал бүхэн
Бусдын тусыг бодсоноос гарна."

"Олон зүйлийг ярих хэрэг юун, гэгээрсэн бурхадууд бусдын тусыг хийсэн. Эгэл нялхасууд амин хувиа хичээсний ялгааг харахтун."

"Өөрийн жаргалыг бусдын зовлонгоор сольж чадахгүй бол бурханы хутаг олохыг бүү хэл орчлонд ч жаргалыг олж чадахгүй."

" Бодь сэтгэлийн хөлгийг унаад амгалангаас амгаланд зорчихоос саруул оюун ухаантай хэн ч татгалзахгүй" ...

🙏🏻🙏🏻🙏🏻
Dalailama.mn

Дөрвөн зүйлийн ухамсарт гэрчлэлээр гэм бүхэн өөрөө арилж, эрдэм бүхэн аяндаа дэлгэрнэ гэж Бурхан багш сургажээ.

Уламжлалт орчуулгад “Дурьдлыг агуулах дөрвөн зүйл” гэдэг.

1. Биед дурьдлыг агуулах - Үйлдлээ ухамсарлах, үйлдэл үгүй үед амьсгалаа ажиглах.

2. Бодолд дурьдлыг агуулах - Бодлын урсгалд авталгүй хөндлөнгөөс гэрчлэх.

3. Мэдрэмжид дурьдлыг агуулах - Таатайд нь шунаж, таагүйд нь уурлалгүй тэгш амгалан ажих.

4. Ном (Дарма) буюу мөн чанарт дурьдлыг агуулах - Хоосон төлөвт орших үедээ ажиглагч ухамсар өөрийгөө гэрчлэх.

АГНИСТЫН ГЭГЭЭ - Судар тарнийн дээжис номоос

ЖАДО РИНБҮҮЧИ БАГШИЙН АЙЛДВАРААС: Бид энэ дэлхий дээр хүн болоод төрчихсөн байна. Гэхдээ түр зуур л зочлон ирсэн "жуулчин" юм. Хүн төрөлхтөний ихэнх нь 100-с дээш наслах нь ховор. Ер нь 100 хүрвэл хамгийн дээд нь болж байна. Нэг жилд 360 хоног байдаг гээд үзвэл 36000-хан хоног л энэ дэлхий дээр байж чадах, түүнээс илүү байж чадахгүй байна шүү дээ.

Тэгэхээр энэ богинохон хугацаандаа утга учиртай сайхан амьдрах хэрэгтэй. Бид хэчнээн хичээгээд эд таваар, эд хөрөнгө цуглуулаа ч гэсэн хэдхэн жилийн дараа тэрнээсээ өчүүхэн төдийг ч авахгүйгээр буцна. Нэг жуулчин хүн зочид буудлын өрөөнд хэд хонож байгаад дараа нь тэр буудлынхаа бүх юмыг орхиод явдагтай адилхан л бүгдийг нь орхиод явах хэрэгтэй болно.

Тиймээс бид юу гэж бодох вэ гэвэл "Би дэлхий дээр түр зуур зочлон ирсэн энэ хугацаандаа бусдын хүчээр сайн сайхан амьдарч байна. Тиймээс би аль чадахаараа бусад хүмүүст, энэ нийгэмдээ сайн сайхан зүйл бүтээх юм сан. Сайн юм бүтээж чаддаггүй юмаа гэхэд нийгэмд болон нийтэд хортой, бусдад хорлолтой үйлийг үйлдэхгүй байхыг хичээнэ" гэж амьдарвал бидний энэ насны амьдрал маань аз жаргалтай байж чадах юм шүү ...

АЗ ЖАРГАЛЫГ ГАДНААС БУС, ДОТООД СЭТГЭЛЭЭСЭЭ ХАЙХ ХЭРЭГТЭЙ ...

Далай багш: Сэтгэл зөөлрөхийн хэрээр номхон дөлгөөн байсны ач тус, үр дагавар нь ирж, амьдрал улам бүр аз жаргалтай болдог. Тиймээс аз жаргалтай амьдралыг гаднаас бус, зөвхөн дотоод сэтгэлээсээ хайх хэрэгтэй ...

Номын айлдвар - Билгүүний Үндэс

2022 он 11 дүгээр сар 25-26 (Монголын цагаар 10:30-12:00)

Дээрхийн Гэгээнтэн Далай Лам Солонгосын сүсэгтнүүдийн хүсэлтээр хутагт Нагаржунайн "Билгүүний Үндэс" номыг тайлбарлан айлдана. Энэтхэг, ХП, Дарамсала. 2022.11.25-26.

Дээрхийн Гэгээнтэн Далай Ламын албан ёсны цахим хуудас https://mn.dalailama.com/live болон фейсбүүкийн https://www.facebook.com/Dalailamamn хуудсаар номын айлдварыг монгол хэлний орчуулгатайгаар хүлээн авч үзнэ үү.