Proboxing_uz

🇺🇿🇲🇽🥊Шаҳрам Ғиёсов Пабло Канони мағлуб этди ва чемпионлик камари учун расмий даъвогарга айланди

🇺🇸АҚШнинг Орландо шаҳрида Matchroom Boxing ва DAZN ҳамкорлигидаги катта профессионал бокс оқшоми давом этмоқда.

Ҳозиргина ярим ўрта вазн тоифасидаги ҳамюртимиз Шаҳрам Ғиёсов мексикалик Пабло Сезар Канога қарши кечган жангини якунлади. Ўн икки раундга мўлжалланган Элиминатор мақомидаги жанг 11-раунддан сўнг тўхтатилди. Боиси, раунд якунидаги тўқнашувдан кейин Кано йиқилиб тушди ва оёғидан жароҳат олди.

Шундан сўнг мексикалик жангни давом эттира олмаслигини маълум қилди. Бу пайтга келиб Шаҳрам жангда катта устунликка эга бўлаётганди ва якунда ҳакамларнинг якдил қарори билан ғалаба қозонди. Уччала ҳакам ҳам 109:99 ҳисобидаги ғалабани Ғиёсовга тақдим этган.

Жангнинг 3-раундида Шаҳрам чап қўл зарбаси билан рақибини нокадаун ҳолатига ҳам тушириб қўйди. Бугунги ғалаба чарм қўлқоп устамизни WBA камари учун мажбурий даъвогарга айлантирди. Ғиёсов 15-жангидаги 15-ғалабасини тантана қилди.

🇺🇿🥊✅Исроил Мадримов Жошуа билан бир оқшомда камар учун жанг қилади

Профессионал боксчимиз Исроил Мадримов навбатдаги жангини қачон ва кимга қарши ўтказиши расман аниқ бўлди.

Чарм қўлқоп устамиз 8 март куни Саудия Арабистонининг Ар Риёд шаҳрида кечадиган бокс оқшомида россиялик Магомед Курбановга қарши рингга кўтарилади. Жангнинг вакант бўлиб турган WBA Regular камари учун ўтказилиши кутилмоқда. 

Эслатиб ўтамиз, 8 март кунги оқшомнинг марказий жангида супероғир вазн тоифасида собиқ жаҳон чемпиони Энтони Жошуа собиқ UFC чемпиони Фрэнсис Нганнуга қарши баҳс олиб боради.

🇺🇿🥊WBO рейтинги. Ҳасанбой Дўсматов кўтарилди, қолганлар ўз ўрнида

Бутунжаҳон бокс ташкилоти (WBО) февраль ойи учун янгиланган рейтингни эълон қилди.

Унда ўзбекистонлик боксчилардан фақатгина Ҳасанбой Дўсматовнинг ўрни ўзгарган. У 7-поғонадан 6-ўринга юқорилаган. Қолганлар эса ўтган ой рейтингидаги ўз ўринларини сақлаб қолишган.

✅Рейтингдан 6 нафар боксчимиз жой олган:

Ҳасанбой Дўсматов (биринчи ўта енгил вазн (48,8 кг): 6-ўрин (ўтган ой 7-ўринда эди);

Олимжон Назаров (ўта енгил вазн тоифаси - 50,8 кг) 5-ўринда қолди;

Муроджон Аҳмадалиев (биринчи ярим енгил вазн тоифаси - 55,3 кг) 7-ўринда қолди;

Шаҳрам Ғиёсов (яримўрта вазн тоифаси - 66,6 кг) ўтган ойдаги каби 3-ўринни эгаллади;

Бектемир Мелиқўзиев (суперўрта вазн - 76,2 кг) ўтган ойдагидек 7-поғонада;

Баҳодир Жалолов (супер оғир вазн - 90,7 кг) 15-ўринда қолди.

🇺🇿🥊✅Қудратилло Абдуқаҳҳоров янги промоутер билан шартнома имзолади

Профессионал боксчимиз Қудратилло Абдуқаҳҳоров янги промоутер билан шартнома имзолаганини хабар қилди.

Қудратилло Абдуқаҳҳоровнинг янги менежери Луис Кики Магана — DAZN, TopRank ва шунга ўхшаш кўплаб машҳур компаниялар билан бирга ишлаган.

Маълумот учун, ярим ўрта вазн тоифасидаги чарм қўлқоп устамиз сўнгги жангини ўтган йилнинг 17 ноябрь куни Тошкентдаги "Ҳумо Арена"да танзаниялик Маоно Аллига қарши ўтказганди. Ўшанда 8 раунд этиб белгиланган жанг иккинчи раундда якунланган, Қудратилло рақибини нокаут орқали мағлуб этган эди.

Бу Абдуқаҳҳоров учун иккита кетма-кет мағлубиятдан кейин қўлга киритилган ғалаба бўлганди. Ҳамюртимизнинг ҳисобидаги ғалабалари сони 20 тани (12 нокаут) ташкил этмоқда.

🇺🇿🥊✅Расман. WBA Ҳасанбой Дўсматовнинг чемпионлик жангига буйруқ берди

WBA ташкилоти минимум вазн тоифасидаги жаҳон чемпиони, таиландик Тамману Ниёмтронгнинг навбатдаги ҳимоя жангига буйруқ берди.

Аҳамиятлиси, Ниятронгга бу сафар ҳамюртимиз Ҳасанбой Дўсматов рақиблик қилади. Ташкилот томонлар келишувга эришиши ва музокаралар ўтказиши учун 30 кун вақт берди.

Маълумот учун, 33 ёшли Ниёмтронг фаолияти давомида 24 та жанг ўтказиб, уларнинг барчасида ғалаба қозонган. Бу у учун 12-ҳимоя жанги бўлади. Ҳасанбой Дўсматов эса проф фаолияти давомида 6 та жанг ўтказиб, барчасида зафар қучган. Чарм қўлқоп устамиз WBA рейтингида иккинчи ўринни эгаллаб турибди.

Аввалроқ, WBA ташкилоти ярим енгил вазн чемпионлиги учун Отабек Холматов ҳамда америкалик Раймонд Форд иштирокидаги жангга буйруқ берган эди.

🇺🇿🥊WBA рейтинги янгиланди, тўрт нафар ўзбек боксчиси 1-ўринда!

Бутунжаҳон бокс ассоциацияси (WBА) январь ойи якунларига кўра янгиланган рейтингни эълон қилди. Ушбу рейтингдан 7 нафар боксчимиз ўрин олган. 

✅Ҳозирда уларнинг 4 нафари ўз вазнларида пешқадамлик қилмоқда:

Ҳасанбой Дўсматов - (минимал вазн) 2-ўрин;

Муроджон Аҳмадалиев (биринчи ярим енгил вазн) 1-ўрин;

Отабек Холматов (ярим енгил вазн) - 1-ўрин;

Ботир Аҳмедов (супер енгил вазн) - 8-ўрин;

Шаҳрам Ғиёсов (яримўрта вазн) - 1-ўрин;

Исроил Мадримов (супер ярим ўрта вазн) - 1-ўрин;

Бектемир Мелиқўзиев (супер ўрта вазн) - 6-ўрин.

🇬🇧🇺🇦✅Расман! Фьюри - Усик жанги 18 май куни ўтказилади

Хабарингиз бор, 17 февраль куни ўтказилиши лозим бўлган жанг Фьюрининг жароҳати сабабли бекор қилинганди.

Ушбу профессионал бокс оқшоми ташкилотчилари турнирни сақлаб қолишди. Энди супероғир вазн тоифаси мутлақ чемпионлиги учун жанг 18 май куни Саудия Арабистони пойтахти Ар-Риёд шаҳрида бўлиб ўтади. Айни пайтда британиялик Тайсон Фьюри WBC, украиналик Александр Усик эса қолган камарлар соҳиби бўлиб турибди.

Мазкур проф бокс оқшомида рингга кўтарилиши лозим бўлган ҳамюртимиз Баҳодир Жалоловнинг черногориялик Дилан Прашовичга қарши жанги янги санада бўлиб ўтадими ёки йўқ, ҳозирча буниси номаълум.

🇺🇿✈️🇺🇸Бектемир Мелиқўзиев навбатдаги жангини ўтказиш учун АҚШга жўнаб кетди

Профессионал боксчимиз Бектемир Мелиқўзиев навбатдаги жангига тайёргарлик кўриш мақсадида АҚШга йўл олди.

Аввалроқ чарм қўлқоп устамизнинг март ойида Элиминатор, яъни чемпионлик йўлидаги саралаш жангида рингга кўтарилиши ҳақида хабар берган эдик.

Эслатиб ўтамиз, Бектемир Мелиқўзиев сўнгги жангини 8 октябрь куни Алантес Фоксга қарши ўтказиб, рақибини нокаутга учратганди.

✅МУҲАММАД АЛИ ҳақиқатлари

"Бутун умрим давомида синовларга тутилдим. Иродам, жасоратим ва қувватим синалди. Ҳозир эса сабрим ва бардошим синалмоқда. Йўлнинг ҳар қадамида Аллоҳнинг мен билан бирга эканига ишонаман. Унинг ҳозир мен билан эканини ҳар қачонгидан ҳам яхшироқ биламан. Қандай яшашни умрим бўйи қадам ба қадам, лаҳза ба лаҳза ўргандим. Ҳаёт йўли мен учун узун бўлди. Мен – ишқ, тушуниш ва ҳақикат излаб чиққан сайёҳман. Ҳамон ўрганаяпман", - деганди афсонавий Али.

🇺🇿🥊Баҳодир Жалолов WBO рейтингидан жой олди

WBО январь ойи учун янгиланган рейтингни эълон қилди.

Унга кўра, супероғир вазн тоифасидаги боксчимиз Баҳодир Жалолов ҳам рейтингга киритилди.

✅Шу тариқа, рейтингдан 6 нафар боксчимиз жой олди:

Ҳасанбой Дўсматов (биринчи ўта енгил вазн (48,8 кг): 7-ўрин (ўтган ой 8-ўринда эди);

Олимжон Назаров (ўта енгил вазн тоифаси - 50,8 кг) ўтган ойдагидан 2 поғона юқорилаб 5-ўринга жойлаштирилди;

Муроджон Аҳмадалиев (биринчи ярим енгил вазн тоифаси - 55,3 кг) 7 ўрин (ўтган ой 6-ўринда эди);

Шаҳрам Ғиёсов (яримўрта вазн тоифаси - 66,6 кг) ўтган ойдаги каби 3-ўринни эгаллади;

Бектемир Мелиқўзиев (суперўрта вазн - 76,2 кг) ўтган ойдагидек 7-поғонада;

Баҳодир Жалолов (супероғир вазн - 101 кг) 15-ўринга жойлашди.

🇺🇿✈️🇺🇸Шоҳжаҳон Эргашев АҚШга жўнаб кетди

Профессионал боксчимиз Шоҳжаҳон Эргашев навбатдаги жангига тайёргарлик кўриш мақсадида АҚШга йўл олди.

"Америкага йўл олдим. Ин Ша Аллоҳ, ҳаммаси яхши бўлиши керак. Ҳаммасини ўз ўрнига қўйиб келаман. Мендан ҳавотир олган барчага катта раҳмат", - дея ижтимоий тармоқдаги саҳифасига сурат ва унинг остида изоҳ қолдирган Эргашев.

Эслатиб ўтамиз, Шоҳжаҳон Эргашев 2023 йилнинг 26 ноябрь куни IBF йўналиши чемпиони Сабриель Матиасга қарши жанг қилиб, жароҳат сабаб муддатидан олдин мағлуб бўлган эди. Бу чарм қўлқоп устамизнинг фаолиятидаги илк мағлубияти бўлганди. Унинг ҳисобида 23 та ғалаба бор.

Аввалроқ, Эргашев бошлаган иши якунланмагани, АҚШга қайтиб, март ойида яна жанг ўтказиши ҳақида айтган эди.

🇺🇿🥊Холматов чемпионлик жангига Шаҳрам Ғиёсов ва Ражаб Бутаев билан бирга тайёргарлик кўрмоқда

Ярименгил вазн тоифасидаги проф боксчимиз Отабек Холматов навбатдаги жангига тайёргарликни АҚШнинг Индио шаҳарчасида олиб бормоқда.

Чарм қўлқоп устамиз 2 март куни WBA чемпионлик камари учун америкалик Раймонд Фордга қарши рингга кўтарилади. Холматов ушбу жангига Жоэль Диас қўл остида тайёргарлик кўрмоқда. Машғулотларда Шаҳрам Ғиёсов ва Ражаб Бутаевни ҳам кўриш мумкин.

Эслатиб ўтамиз, бўлажак жанг Top Rank промоутерлик компанияси томонидан ташкил этилмоқда. Компания кимошди савдосида 317 500 доллар эвазига жангга эгалик қилиш ҳуқуқини сотиб олган эди.